البارحه والعين ماذاقت النوم=والفكر من كثر الخيالات محتار
اتفردت فيني كوابيس وحلوم= حاست منامي واقلبت ليلي انهار
صادفت بــ / احلام المساء سيد القوم=في جعبته يحمل مهمات واخبار
قلت أرحب أرحب يا عسى تعيش وتدوم=و يا عل ساعه جابتك تشعل أنوار
بالي ترا مشغول والصدر مكتوم=والنفس صار احساسها شبه منهار
قلي بسرعه موجز اخبار وعلوم=حدت جنابك تلفي اليوم للدار
قال السموحه لنني جيت مرغوم= الواجب اجبرني وتصريف الأقدار
جيتك اعزيكي وواسيك وأقوم= باللي ضميري ساقني له بالاصرار
قلت ايش صاير قول كافي ترا اليوم=ماعاد فيني حيل خمن ولا اختار
قال اعذريني محور الجد مذموم= هذا زمان التسلية والتمنظار
وقال البقاء براسك غدا الطيب معدوم=مات وشخوصه مابقي منها آثار
حلم ٍ ترجيتيه قد صار مرحوم=اقرئي عليه الفاتحه واعلني الثار
واوعي الندم يصدر على الحزم مرسوم= يبقى حليف لـ / خافقك وين ما سار
وادعي المُهيمن يرزقك فال منضوم=شربه سعادة وأكله ورود وأزهار
ترا السماء ياما بها انجوم وغيوم=ثملا خصيبة مير ماتنتج أمطار
إتحذري ثم داوي الجرح بالصوم= عن كل غاوي للمتاعب وثرثار
قلت اصبر اصبر جايز السمع موهوم=وش انت جاي إتخربط إبدرب الأخطار
اركد وقل وش صار في عالم الشؤم=وش لون ينباع الوفاء بأرخص أسعار
دنيا غريبة زودها لوم في لوم=تاقف مع حاسد وخائن ومكار
رغم إن قراري بالوفاء كان محسوم=عن خوَة العاذل وعن كيد الأشرار
بذرت طيبة خاطري نُذر وسلوم=جنيت غدر وقهر و آهات وإنكار
دخلت بحر التضحية أعرف العوم=غرقت مابين الطحالب والأحجار
كن الزمن واجه منيّته محتوم=فجأة بدون إذن ٍ ولا سابق إنذار
وعز الله إن اللي حصل كان مفهوم=أدري بإن هذا الزمن حيل غدار
وإنه ردي ومن وثق فيه محروم=يفقد غلا روحه وعزه والإكبار
لكن عزاي وحزني لـ / قلب مصدوم=أجج لهم حبه وزجَوّه فـ / النار
قال ارتجي من بأمره الكون محكوم=مفرج الكربات علآم الأسرار
لا تيأسي لاتزعلي وأنسي إضيوم=طبعاً تعود يخلط الجد بإهزار
قلت الله الله جيت وانصفت مظلوم= مشكور تعداد الكواكب والأقمار
أنا خفوقي عاش ويموت محشوم=مايقبل الحيله وتزييف الأدوار