يانور هاتي لنا ذا الليل قاروره=دام أبن فدغوش قاله طيب السيره
البارحه بين مفضوحه ومستوره=وبعض العرب بين تهليله وتكبيره
وصلت لي باب بيتن طافين نوره=لو كان بعض الخطوط اليوم محظوره
الجوا مظلم وبعض الناس مطيوره=والكل منا تعلق روحه إبطيره
لو صاحي العقل مانفهم على شوره=خله يمين الطريق إيدق تاشيره
وشف نية الخير محقوره وممروره=وسوالف الدبلجه كثرة مساييره
وش عاد هاتي رحيق الريق يانوره=عسل مصفى مبرد في قواريره
عليك حالي من الحرمان مسعوره=وريقك شرابن قديم وزاد تخميره
بدخل معك وادين ماقطفت أزهوره=ولعلها تروح من جرفن لدحديره
سما سما والصدور اليوم مسروره=وان ضاعت الطبخه الي في يدك خيره
مافاد فرعون ملكه وافخم أقصوره=ولا ضر موسى كثير السحر والطيره
على بساط الشعور مسويه ثوره=من عام الأول على وجه الزمن غيره
وعقول متريحه وعقول محروره=ومعايد القريتين افلس من الديره
تصادم الفكر والإحباط له دوره=يلحق على مخ صاح الراس ويديره
لو همزة الوصل منصوبه ومجروره=تبقى المفاهيم وحده حين تعبيره
صافحت كف الزمن واخذت له صوره=على سرير الأماني زان تصويره
والجرح يمكن يطيب ان مر دكتوره=لكن بعض الجروح إيطول تاثيره
ومهما قسى الوقت والا زاد في جوره=عوايد الطيب ماحبيت تغييره
والمرجله مهنتي ماشي بدستوره=واطوع الكايده واسعى بتصخيره
لاني نسل لابتن بالطيب مخبوره=ومن ديرة ال السعود العز والغيره
هجرت درب الردى واخلفت طابوره=ولاني بحال الذي ينفخ على زيره
وان كان فوق الشجر عشرين عصفوره=عصفور في يدك يارمز الثقه خيره