مدخل: يكذب من يقول انه لم يمر بذكرى مؤلمة
هذه أبيات تمخضت عن ذكرى ماضية وحزينة لاغير
أعقبها احتواء من بعد نزف
اتمنى ان ترتقي لأطراف ذائقتكم

.................................................. ....................

كتبت وجداني على صفحة الصمـت
من نزف ذكـرى مابعـد فارقـتـنـي

كتم المشاعر يعـتبر يا بشـر كـبْـت
وانـا رضيـت بكبتهـا واتعبتـنـي

جاريت نفحات الهوى لين طاوعـت
وارخصت نفسي عقب ماطاوعتنـي

يا ليتني من شهدهـا مـاتذوقـت
ماكان ذقت السـم يـوم اعدمتنـي

وياليتني مـن شطهـا مـاتقـرّبـت
ماكان ذقـت الموت يـوم اغرقـتنـي

وياليتني من بارجـة رعبهـا خفـت
ماكان من نزوة خطرها فجعَـتـنـي

ياحظ...في حقى ورى ليه ماانصفت؟
اوراقك السودا ورى ماانصفـتـنـي

وشلون عـنّي في الملاقى تخلّـفـت؟
حتـى شفاقـة رحمتـك خالفتـنـي

ماني بقابل لك عـذر لـو تعـذّرت
خـذلان بيبانـك تـرى كلّـفتـنـي

إرتاح لاتتعب عسـى مـاتكـلّـفـت؟!
ماعمر فزعاتك وفَـت واسعـفتنـي

انا علـى حـرف الكلافـه تعـذبـت
صامدتها بالصمـت ليـن جرحتنـي

كم كلفتـنـي بالخفـا لـو تصبـرت
فينـي ملامحهـا عَـلَـت واعتلتنـي

هذي حقيقة قصتـي لـو تحـفّـظـت
ملامح الذكـرى طَـغَـت واجبرتني

مخرج: الفطن من يستفيد من تجربته المريرة ويقبل
على الدنيا متفائلا....مازالت الدنيا فيها خير
كيف لا وفيها المفترضة المنتظرة (هوى روحي)
ومثل مايقال لو خليت لخربت