إلى جنان الخلد ياعمي ( فلاح بن فياض الزعير )

[دهمشي]

يا قاف جسد نزعة البين تجسيد=وأرسم بكاة الوجد وأرسم لحونه
في نعي عمي جود الوزن تجويد=وإلزوم معنى ما بنينا نصونه
شيد مواجع واقع المر تشييد=ساهر تغرق هالمدامع جفونه
لا ما وقف هتانها والحشا بيد=لا ما صبر هالقلب حاضر حزونه
عم السعد ما أظن هالذارف يفيد=ولا أظن مثلي فيك تبخل عيونه
دمعي يردد حرقة الوجد ترديد=واللي فقد غاليه ربي بعونه
ضاق المدى يا عم والهم توليد=والعاطفه تلبس حشاي المهونه
يا عم أنا مشتاق والشوق تمهيد=لإيقاظ حسٍ مل ضيقة ركونه
يا عم أنا ناعي وفي غصتي قيد=والسالفه غيبة قلوبٍ حنونه
غبت انتبه هالغيم وأبكا بك الغيد=وأمطر سفر والنوح طاري مزونه
إيه المطر واقف وأنا بي تجاعيد=إيه العطش غث المعاليق لونه
وجهي كآبه والأسى فيه تنكيد=والعمر غربه والمسافه بدونه
عمٍ يشيل الحمل زبن الأجاويد=ملاذ روحٍ بالزمان إمغبونه
الحاتمي العف مابه مناقيد=ضرغام عاداته يمد المعونه
ثابت ولا شل الخطا طبع تعقيد=ولا عاقته عن طيب رايه ظنونه
متكدرٍ مجلسك كب المواعيد=مل إجلساه وكل قومٍ يجونه
مثله سيوف العز وأيضًا بواريد=وإعصابتك والبشت تبكي متونه
يا الله يا اللي لك عباده وتوحيد=متفردٍ بالملك يجري شؤونه
يا الله ترحم من سما بالتقاليد=من سن عاداتٍ وقنن فنونه
من صار بالطولات سيدٍ على السيد=وأعلى مراتب لابةٍ يتبعونه
ياخذ على الجزلات مبدأ وتوكيد=وإعداه قبل الصحب ما يجهلونه
متمكنٍ بالطيب ما جابها كيد=النايفه كسبه وتلفي حصونه
ويجيبها بغته ومن دون تشديد=عند اللوازم قاد ركبه جنونه
للحلم حزاتٍ بها فاد تضميد=وخطو الفتى نوبات سجنه سكونه
راضين ما نجزع ولا عنها إنحيد=أقدار ربي جارياتٍ بكونه

[ذكرى الغالي]

رحمه الله واسكنه الجنه
وانزل على قلبك الصبر والسلوان
شرفني المرور بهذه البااااسقه
سلمت يداااااك
صح لساااانك مدد بلياااا عدد
تقديري واحترامي لشخصك
وبوحك الراقي
ذكرى الغالي

[ضامية الود]

انا الاالله وانا له راجعون
رحمه الله واسكنه الجنه
وانزل على قلبك الصبر والسلوان
شرفني المرور بهذه البااسقه
سلمت يداك
صح لساااانك مدد بلياااا عدد
تقديري واحترامي لشخصك
وبوحك الراقي
تحياتي وتقديريلك

[سامي احمد]

الله يرحمه ويسكنه الجنه

الغالي

دهمشي

صح الله السانك واعلى شانك
تقبل الورد

سامي احمد

[دهمشي]

صحت أبدانكم ورحم الله موتانا وموتاكم

كل الشكر لجمال حضوركم

[عهود المحبه]

رحمه الله واسكنه فسيح جناته

صح السانك واعتلى شانك

الله يعطيك العافيه

تحيتي لك

[دهمشي]

المشاركة الأصلية كتبت بواسطة عهودالمحبه

رحمه الله واسكنه فسيح جناته

صح السانك واعتلى شانك

الله يعطيك العافيه

تحيتي لك

صح بدنك ، الله يعافيك
كل الشكر لجمال حضورك

[عبدالعزيز الفدغوش]

رحم الله الفقيد وأسكنه فسيح الجنان

والهمكم الصبر وحسن العزاء والسلوان

الرائع لافي الدهمشي

صح الله لسانك وأجـدت في بيانك

وبقي التمـــيز والاقتدار عنوانك

وأعلى الرحمــن شــأنك وكيانك

وشعر الرثاء من أصدق أغراض الشعر