ياسعود سجلت لك في خــــط يدي=وبصمت بلابهام تحت اعترافــــي
وسجلت بالقرطاس وأبديت ســدي=وبيحت لك ماكان بالصدر خــــافي
لونها ياسعود ماهـــــــــــي بــودي=لكن ظروفي والزمن ياسنـــــــافي
خلن دموع العين من فوق خـــدي=مثل المطر لاهل فوق الفيـــــافـي
وارهيت لكن حدني الوقت حـدي=واللي تحت يمناي ماهو بكــــافي
ويمناي تعطي والزمان متـــردي=ومديتها ظلاً للأصحاب ضافــــــــي
وقفت في وجه الزمان متصـــدي=في قاسي أيام الدهر كنت وافــي
أهل الرخى وقت الرخى تستعــدي=وايست منهم في نهاية مطافـــــــي
وبانت عزومن بالرخى تجرهـدي=أضحت حقايق ساهر الليل غافــي
أحدن وقف مع شين الايام ضــدي=يحد لي بمصــــــقلاتن إرهافــــــي
واحدن يمر به الطــــــريق متعدي=يشح حتى بالسلام التكافـــــــــــي
واحدن لياجيت بطريقه يصــــــدي=ينكر جميع المعرفة بالتكـــــــــافي
وناديت باسماهم ولاحدن يــــردي=والدار تذريها هبوب السوافـــــــي
وبيت الردى يهده الوقت هــــــدي=يظلم سماه ونور راعيه طـــــــافي
وتحت الثرى كل المعادن تــصدي=الا الذهب يبقى على طول صـافي
والفرع لاصله لاقسى الوقت لـدي=ولاصل لفروعه يمد اللـــــــــحافي
والطيب دربه لردى مايـــــــــودي=دروب لكن بالدروب اختـــــــلافي
وياسعود فرقن بين مزحي وجـدي=ماتدمجه غير النفوس الضـــــعافي
واللي يجيب العــــــلم واللي يودي=راع الردى يمرضك وانت متعافي
واهل الوفاء لشدوا الحـــــبل شدي=وقفاتهم بلسم على الكبد شـــــــافي
وياسعود منهم باللوازم يســـــــدي=واين النشاما والقلوب النظافـــــــي
وياسعود عجل بالخطى لاتهــــدي=وخل الحمول اثقال تصبح خفــافي
وثوب الردى ياسعود ماهو بــقدي=ولامشي مماشي درب فيه انعطافي
والشعر شعري والكتابه بيــــــدي=بالمسك والريحان ختمت قافـــــي