لاجلك اغض الطرف ....جديدي

لاجلك اغض الطرف واغمض العين
ما ابغى عيوني تنعم بشـــوف غيرك

ازرع ورود الشـــــوق فيني بســاتين
واروي ضماها من بقايا عـــــــبيرك

واتنفسّك بين الزهر والرياحـــــــــين
و اغفى على جالك وانام بحــــريرك

وأتذكرك واشكي زمانً غـــدى شــين
واتخيلك يمّي واجيك استجــــــــــيرك

وقتي أســـى بالنوح والحـــزن والبين
ينثر حَــــنيني علّ يصحــى ضميرك

لجــل الوفا والحـــب والماضي الزين
جــــــد لي بوصلك دام قلبي أســـيرك

مشــــتاق لك بالحـــيل واشتاق لسنين
كنّا ســـــــوا فيها مصـــيري مصيرك

لا تبتعد روحي غــــدت لك مــــيادين
تتوجَّدك بين الســــــــــموم و هجيرك

لا تبتعــــــــــد خلك هنا بين عــــينين
نســــمر على ضو القمر واســـتنيرك

ننزف حروف الود والشعـــــــر بيتين
تعزف لحـون الحب تمدح عشــــيرك

تتصدّر اعماقي وكل العــــــــــــناوين
واملا عـــــيوني شوفتك واســـــتثيرك

وارويك من نبع الوفى فيض حــرفين
واشـــعل غـــــرامك و بغرامي أثيرك

حب و تفاني و انتعاشـــــــــة خفوقين
تروى غرامي و ارتوي من غـــديرك

واوقد قـــــــناديل الوفى للمحــــــــبين
واضرب مثل فينا لهم واستخـــــــيرك

والعن أبو جَدّ الجفا واروي العـــــــين
فيك انت ياللي ما يوازيك غــــــــيرك