شبكة الشموخ الأدبية - ألف ليله وليله!!

ياليت الأيام تاخذ لي معك موعد
واماطل الوقت من ليله إلى ليله

في مركب الوصل لا نجفى ولا نبعد
واحط في كبد عذال الهوى كيله

خل العواذل علينا تزبد و ترعد
والحاسد يضف عفشه لا فتر حيله

وانا معي شوق لا يركد ولا يقعد
مثل الشعيب الوسيع اللي هدر سيله

واحسب الايام واعد الليالي عد
واعيش جدول غيابك مع تفاصيله

يبو جديل اشقر ٍ لا سايح ولا اجعد
ياخذ مع نفحة النساس له ميله

من شاف وضّاح خدك يالغضي يسعد
و يطيب ليل المودّه مع تعاليله !!!

سهم الهوى في محافظ مهجتي يصعد
ربحان من دون تعزيزه و تمويله !!!

واخذ الجواب المعرّب و الصحيح يعد
عيّشتني ألف ليله يالغضي و ليله !!

قلمي/فهد البدر