ياللي تنشد عن علوم الـذي طـاف=كل البحـور وكـل دولـه وديـره
خذ من علومي علم اوصافه اوصاف=جزلٍ سمينٍ يشتعـل فـي سعيـره
الزين عقـب المغربيـات ينعـاف=غيدٍ لهن بالزيـن ذكـره وسيـره
فيهن حلا طاغي وليـن وتعطـاف=وفيهن جنانٍ يشعـل القلـب غيـره
حلوات وصف وفاهماتٍ بالاعراف=زينات منطق صافيـات السريـره
بنات قومٍ طيبهم غصـب ينشـاف=الاد مغـرب بالليالـي العسـيـره
الزين في لميـا وتغريـد والطـاف=ماهوب في حصه وكشـره منيـره

ياهاجسي حضر من الشعر رجّاف=جـزلٍ معبـر ماتوانـى مطيـره
يقلع من الهاجس وصدره على آف=ويهبط على شاعر ردي قل خيره
ياشاعرٍ بالقول جاوزت الاعراف=واجحفت في بنت الكرم والجزيره
خالطت مابين اللوالي والاصداف=ياكيف لميا جاوزت بـك مطيـره
بنتٍ وتسوى بالنساء عشرة الاف=فيها الكرم فيها الشرف والستيـره
سيرة بنيّة بالطهر تسرف إسراف=تكفيك يالمخفوف عن كـل سيـره
ماتلبس المايوه والبـاس شفـاف=ولاكثروا العطشى على جم بيـره
ولابينت في مشيها هـز الارداف=ولاكان ملبسهـا ملابس قصيـره
من دون مطلبها لها الكون وقّـاف=نمشـي لديـره ونتعنّـى لديـره
ثقل الجبال تصير لعيونها اخفـاف=وجيوشنا لأجل العـذارى مغيـره
اسنين نطحن ونتزاحم بالاسيـاف=عين البسوس الها الرحى مستديره
اطّير روؤسٍ ثابته فوق الاكتـاف=والدم الاحمـر بالهنـادي نثيـره
بنت الجزيرة حيّها بنت الاشراف=الاولى تبقى بالحشـا والاخيـره