الاجواد مثل الذهب مايختلف لونه
 

هذه القصيدة قالها الشاعر عبدالرحمن بن سعد بن صغير القريني وهي تحارب عادة ذميمه وهي النميمه
_________________________

اشوف ناس رخيص الهرج يشرونه
ولا لهم مع هل المعروف ميقافي
يفرح بهرج الردى ويزيد مضمونه
ويسمع رخيص الكلام وينقله وافي
هاذا مرض قلب ولا وش تسمونه
تنفيه كل القيم تنفيه الاعرافي
راعي النميمة به الاحقاد مدفونه
ناس لنقل الكلام عقولها ضعافي
لايخدعك لو يبين ضحكة سنونه
يعطيك هرجه وهو مايظهر الخافي
لو كل ناس ضعيف العقل ينهونه
ماصار فيه ازدواج وكثرة خلافي
الأجواد هرج القفى ماهم بيبغونه
يبغون رجل كلامه كالذهب صافي
والانذال درب الشهامه مايدلونه
مايعرفون المروه دربهم هافي
والاجواد مثل الذهب مايختلف لونه
صافين مع دورة الأيام عرّافي
والانذال درب الشجاعة مايعرفونه
وقت المواجه يجي نذل وخوافي
والاجواد لاعاهدوك بعهد يوفونه
يوفون عهدك ولو كان الزمن جافي
عاشر كريم يحفظ السد ويصونه
مواقفه في نهار الضيق تنشافي
اذا بدالك لزوم ينثني دونه
في موقفه مايدور عندك أهدافي
والناس كلن على طبعه وقانونه
من جرب الناس يلقى أشكال واصنافي

رد: الاجواد مثل الذهب مايختلف لونه