النصيحة

سج القدم لين اعتلا رأس مرقاب = وهز الخفوق بذكرياتن قديمه
قلبي يريد الود والود غلاب=حتى ركب ودي وشوقي طميمه
باللي ليمن الزمن كشر الناب=يضرب زماني بالسيوف الصريمه
اخوي سيف العز قطاع الارقاب=سيف الزعيم اللي يساند زعيمه
لوغاب عن عيني عن البال ماغاب=الوصل ذعذاع الهبوب ونسيمه
قلت انصحه وأفك لمناصحه باب=نصايحً بين الحبايب عظيمه
سج القدم عن مجلس فيه تغتاب=وابعد عن اهل الثرثره والنميمه
وأهل الرخى لاتحطها بالقفى أصحاب=فارق مجالسهم يمال الغنيمه
وان جوك لاتبدي لهم أي ترحاب=واحذر تروح ان جتك منهم عزيمه
والحق قوله كان للحق طلاب=كتمان قول الجق اكبر ظليمه
لاتستحي منهم لو اغضبهم اغضاب=لاترتكب في حق نفسك جريمه
شرواك رجالاً يحسبله احساب=رجال له عند الرجاجيل قيمه
وان كان مالك مع اهل الشر مشعاب=اسرج عنان الخيل وشداد ريمه
واحذر عدوك لو يهيبك لاتهاب=ولاتبين في وجهك مواري الهزيمه
خلك عظيمن سطوته ترهب ارهاب=وخلك علاجن للجروح السقيمه
وخلك صريحن لينن تكسب اصحاب=اصحاب تربطهم علاقة حميمه
وافزع لمن جالك من الوقت منصاب=وخلك زبون اللي زمانه خصيمه
ودار الخفوق اللي لياطبتله طاب=لاشفت لك عنده معزه وشيمه
وادمح خطاء صاحبك واقبل له عتاب=واسلك دروبن واضحه مستقيمه
ولياهرجت اصدق ولاتصير كذاب=الكذب لرجال عاده ذميمه
واسر لاتبينه حتى للاقراب=خل السراير بالحنايا مقيمه
وعن الحرام ابعد وجنب تجناب=والنفس طوعها لامورن كريمه
ود الحقوق اللي على الكاهل صعاب=ورد الودايع يم اهلها سليمه
وارفع يديك لخالقك رب الارباب=واسجد لمن منعم عليك بنعيمه
وخلك مع اهل الحق لاصاروا احزاب=الحق واهله فوق ماحدن يظيمه
ولاتستمع لمسولف الهرج ؤش جاب=والصمت اخير من الحكي والشتيمه
وان جتك شلفا الغدر من كف الاقراب=ذب الك عن جرح القرايب خريمه
وان جتك شلفا الغدر من كف الاجناب=اطعن بشلفا الغدر صدر البهيمه
ووقف مواقيف على غيرك صعاب=وخلك على الشدات عندك عزيمه
وسجل حقائق واقع العرف بكتاب=كتاب يحوي له سطورن عظيمه
وابحث عن الواقع ودور له اسباب =ولاتستشير الا العقول الفهيمه
والبعد جرحن ماتداويه الاطباب=لاصارت دروب المواصل عديمه
والبعد يبقى نوب فكاك الانشاب=ماقسى عذاب البعد ومحلا نعيمه
وراع الهواء شوقه على راس مرقاب=اسمع صدى صوت الوله من صميمه
وانظرلدمع العين من بين الاهداب=من فوق خده مثل دمع اليتيمه
وماحلا صدوق الوسم لهل سكاب=همال غيث منبعه مزن ديمه
وياكثر شوقي لك وانا توني شاب=شوق سكن بالقلب والله عليمه
والا انت لك شوقن للارواح جذاب=شوقن عطاه الله ملامح وسيمه
ذكراك بين الناس تعجبني اعجاب=واشتاق لك شوق الغريم لغريمه
ورجاى باللي من ترجاه ماخاب=سبحان من يحي العظام الرميمه
انه يديم اللي له القلب طلاب=اللي ظلاله كنه مزون غيمه
والناس تحكمها مفاهيم وداب=واللي تعدى الحد ياخذ قسيمه
قلت انصحه وافك لمناصحه باب=نصايح بين الحبايب عظيمه
نصيحة مني حوت صفحة كتاب=انصح بها خويه عسى الله يديمه

الشاعر/عواض معوض