شبكة الشموخ الأدبية

شبكة الشموخ الأدبية (http://www.alshmo5.com/vb/index.php)
-   منتدى دواوين الشعراء (http://www.alshmo5.com/vb/f34.html)
-   -   ديوان الشاعر الكبير فايق عبدالجليل (http://www.alshmo5.com/vb/t1349.html)

مشعل الفدغوش 04-25-2010 08:11 AM

ديوان الشاعر الكبير فايق عبدالجليل
 
(( آخر زيارة ))

آخر زيارة .. حسيت في آخر زيارة
شي بعيونك مختلف .. وشي بحديثك مختلف
حتى حديثك مختلف
كنت بشكوك
وشفت الحقيقه في عيونك .. تعترف
موقف غريب .. موقف أبد ما ينوصف
وين الكلام .. وين الحرارة في السلام
كبير الفرق ما بين .. أول لقا
وآخر زيارة
مدري شقول .. ياحب خانتني العبارة
مدري شقول .. والحر تكفيه الإشارة
كل شي حبيته في بيتك نساني
الهدوء .. الليل .. الصمت .. الأغاني
حتى لون الورد .. الفرحة ومكاني
داهمتني الغربة .. ليتني ما جيت
ليتني رديت
حزني غرّب ضحكتي
لساني ضيّع كلمتي
حسيت بالياس
ومشيت
كنت بشكوك
وشفت الحقيقة في عيونك .. تعترف








(( وهــم ))

وهم .. كل المواعيد
تعب .. كل المواعيد
باسم الحب .. باسم الشوق
مأساتي معاك تزيد
واتم بعيد .. وتتم بعيد
واتم مثل الحزن .. انطر سحابة عيد
اجي ملهوف .. عطش تحت المطر ملهوف
وقتي يطوف .. لوني ضايع ومخطوف
يضيع الشارع بصمتي
وصمت الانتظار سيوف
وكل ما مر وهم صوبي .. اقول انتي واتم بعيد
ألم .. كل ساعة .. وكل لحظة ألم
وين عيون حبتني .. ومنتني؟؟
وقالت لي نعم
تلاشت فرحتي .. وتاهت خطوتي
وحلمي كبير .. في لحظة انهدم
وكل ما مر وهم صوبي .. اقول انتي
واتم بعيد .. وتتم بعيد
واتم مثل الحزن .. انطر سحابة عيد









(( أحبك ))

أحبك كثر خطوات الثواني
كثر ما تبكي في الصمت المعاني
كثر ما تشهق امواج المواني
اجي مثل الربيع غرقان بألواني
اجي وياك ورده تخاف بستاني
طفله شايله احزاني
اجي وياك اتبع سر ناداني
اتبع صمت ناداني
و احاول و انت ما تدري
احاول انا و لساني
احاول و اخسر رهاني
احاول و انا في ضعفي
احاول انهي بركاني


(( ابعاد ))

ابعاد كنتوا ولاّ قريّبين
لمْراد انكم دايم سالمين
ما اقول غير الله ..
الله يكون بعون كل العاشقين

اشتاق .. واسأل عنكم الأشواق
لفْراق .. ما غيّر علي لفْراق
عساكم ما نسيتوني عساكم
عسى ما مر هوى بعدي وخذاكم
ناطر هواكم ناطر
قادر ولاني قادر
ما اقول غير الله ..
الله يكون بعون كل العاشقين

منيتي أسهر معاكم كل ليله
واشتري بعمري رضاكم ليله
يراودني أمل في ليله القاكم
واطرز بالفرح أحزان فرقاكم
ناطر هواكم ناطر
قادر ولاني قادر
ما اقول غير الله ..
الله يكون بعون كل العاشقين

(( سالفة صمتي ))

يلاحقني الورق
تاخذني هموم الوقت من وقتي
اسكت والسكوت أنتِ
أحاول والحلول أنتِ
شسولفلك .. وانت سالفة صمتي
بسمرت الشفايف
بين صمت وصمت
تحديت الزمن
حتى نساني الوقت
خطيتك على الإصرار
على التكرار
وشلتك في سكوت
الحب
حبيبة آخر المشوار
حبي فوق تعريفي
حبي فوق تحريفك وتحريفي
وأنا ملزوم اتصبر
نسيانك مهو بكيفي
وعيونك نجوم الليل
كل الليل في صيفي
أحارب عالم عيونك
أحارب ينكسر سيفي
أبحر فيك يا حلوة
تغرقني مجاديفي
أنا بصحرا سكوتي انتحر وحدي
أعاني الصمت
أعاني الخوف
أعاني وجدك ووجدي
بهاجر من جديد أبدي
بحارب بالجمر بردي
بصمم أوفي في وعدي
وأصمم أحكي ما عندي
ولما يرتفع صوتي
أحيّ حتى الورق ضدي
أنا المقسوم للسكته أنا المقسوم
أنا العايش .. أنا المعدوم
أنا غيمة مطر
وأنا العطش كل يوم
كنت آكل من اشعاري
كنت أشرب من اشعاري
وكنت أعزم على المقسوم
كنت أتعاطى هم الناس
كان ( بيتي ) بيوت الناس
وياما بدفتر بيوتي
طاردني السهر والنوم
وياما بليلي ضاع الليل
في سكة قمر مهموم
وياما بشعري وأشعاري
غفت ياما كثير نجوم
أمشي في شوارع ليل
غريب حتى عن ثيابي
غريب حتى عن احساسي
عن اعجابي
أضيع في غربة الألوان
أسير الصمت وأعصابي
أضيع تحت المطر غابة
ارفضتني أصغر أعشابي
أضيع مثل الطفل في البر
حزن الليل ألعابي
أمشي .. أمشي .. طول الليل
الماضي يوقفني
الذكرى تصادفني
أمشي .. أمشي .. طول الليل
تتعب مني أتعابي
أمشي .. أمشي .. طول الليل
يبكي دربي وترابي
أنا أول شجر
أغصانه ممنوعه
أنا أول شجر
يشرب من دموعه
يهاجر ظلي من تحتي
يترك صوتي حنجرتي
تصير السكتة مشروعة
وبين الهجرة والهجرة
يموت الحب من جوعه
وتبكي خطوة عيوني
تبكي .. تبكي مخدوعه
أحاول امشي واتردد
جميع دروبي مقطوعه

(( أنا آسف ))

أنا اللي يوم تمنيتك
ترجيتك وناديتك
أنا اللي قلت لك
كل الفرح بيتك
تعب صوتي .. ومليتك
تعب قلبي .. وخليتك
حبيبي .. لا أبد مو انت
ذاك اللي تمنيتك
أنا آسف .. أنا آسف
اذا في يوم حبيتك

نثرت الروح في كفك أماني
وقلت اطلب ..
كل الأرض مفروشه بحناني
وكل الشوق سويته اغاني
لا انت صوبي ولا يمّي
ولا حسيت في همي
جيت الحين ترعاني
تصورت الجروح تطيب
في لحظه .. وثواني

أنا اللي قبلك مضحّي
ولا تحتاج حق شرحي
تدري يا سبب يأسي
وسبب جرحي
انت ادري .. انت ادرى
ولا تحتاج حق شرحي
ايدي اللي كتبت اسمك
بدت تمحي ....



لو ما احبك
كلمات: فائق عبدالجليل
لحن: طلال مــــــــــــداح


حبيبي ..لي خطيت اغذرني ..تعب مني التعب
حيرته.. وحيرني.. وخليــــنا الامل حيـــــران
ارجع لي من النسيان..
مـين فيــنا اللي مايخطي ..في حالة غضب
.........
لو ما احبــك عشت في الدنيا غريـــب
لو ما احــبك كنت ذايــع يالحـبيـــــــب
لو ما احـبك مابكي بصدري غرامــي
لو ما احـبك ما تأســفـت بكلامـــــــي
.........
لو ما احـبك ماتبـــــــسم لي زمــانــي
لو ما احـبك عشت طول عمري اعاني
لو ما احـبك ما تغنــّي بك لســــــــاني
لو ما احـبك ما أجـــــيك بشوق اعاني


(( في الجو غيم ))

قبل الوعد
جيت بدقايق
بعد الوعد
جات بدقايق
والتقينا بلهفة العاشق .. التقينا
واهمست .. العيون بتشاور علينا
شاغلتنا
لاحقتنا
واحنا تونا ما حكينا
جيت اقول .. وابعد الخوف بكلامي
جيت اطمنها .. واحسسها بغرامي
قاطعتني .. واهمست همس النسيم
أرجوك ابعد ابعد
ترى في الجو غيم

راحت .. مشت
وعيوني تتبعها
راحت .. مشت
مجبور اودعها
يرضيك يا شوق
كذا العيون تمنعها ؟
يرضيك يا شوق
تطالعني واطالعها ؟
والله لولا عيون الناس
والله لولا كلام الناس
لامشي وراه واتبعه
وازرع في قلبي ابتسامه
آه .. يا أجمل وعد
آه .. صابتك عين الحسد
شاغلتنا
لاحقتنا
واحنا تونا ما حكينا
جيت اقول .. وابعد الخوف بكلامي
جيت اطمنها .. واحسسها بغرامي
قاطعتني .. واهمست همس النسيم
أرجوك ابعد ابعد
ترى في الجو غيم


ومن قصايد الشاعر القريبه لقلبي ... وأتوقع قريبه منكم ولامست أحساسكم

هذه الابيات ...


نســــــــــــــــــاي

نســـــــــاي.. وانت الهوى بالنسبه لى والماي

اسمع أنا صوتك ولا تسمع نداي

اشهق انا باسمك..واشتاق له وانت معي

اكتب على سمعي اغاني

اكتب واغنيك..حيرتني واحترت انا فيك

تزعل بلا أسباب..وتعاند وأراضيك

بكل حالاتك انا أبيك..بكل زلاتك انا أبيك

حبيبـــــــي انت..والا العذاب انت

والا الفرح انت

مدري وش اسميك...

نســــــــــــاي

تغيب والدنيا معك تغيب

تقطع خيوط الشمس عني

ويصبح العالم كئيب

وأصحبت انا لوحدي على

ارضيك غريب

ما تكتفي من غربتي

ما تكتفي من حيرتي

الله عليك كم انت عجيب..الصمت دايم لعبتك

الصمت احيان رهيب

(( المعازيم ))

يوم اقبلت
صوّت لها جرحي القديم
يوم اقبلت طرنا لها
آنا وشوقي والنسيم
وعيونها .. آه يا عيونها
عين لمحتني وشهقت
وعين احضنت عيني وبكت
ويا فرحتي
الحظ هالليله كريم
محبوبتي
معزومه من ضمن المعازيم

في زحمة الناس
صعبه حالتي
فجأه اختلف لوني
وضاعت خطوتي
مثلي وقفت
تلمس جروحي وحيرتي
بعيده وقفت
وانا بعيد بلهفتي
ماحد عرف شلي حصل
ماحد لمس مثلي الأمل
كل ابتسامه مهاجره جات
ورجعت لشفتي
كل الدروب الضايعه مني
تنادي خطوتي
ويا رحلة الغربه وداعاً رحلتي
ويا فرحتي
الحظ هالليله كريم
محبوبتي
معزومه من ضمن المعازيم

يا عيون الكون
غضي بالنظر
واتركينا اثنين
عين تحكي لعين
اتركينا الشوق ما خلّى حذر
بلا خوف بنلتقي
بلا حيره بنلتقي
بلتقي فعيونها
وعيونها أحلى وطن
وكل الأمان
ويا فرحتي
الحظ هالليله كريم
محبوبتي
معزومه من ضمن المعازيم

~ لذة الاصرار

حبيبى اختار

لاتنهار اعصابك

لاتنهار

اعترف بالسر..قول للناس

من حقنا نحب ونعيش

رغم الكون والاقدار

انت النبض فى شوقى

انت الدم فى عروقى

انت انسان خلق عمرى

وخلا لحظتى اعمار

وانا من غير حبك

ريشه فى تيار

ومعاك انته

يموت الفرق...

بين الشوك والازهار

وينبت فى حزن قلبى

فرح واشعار

انا وانت يمكن يوم

نروح عند القمر زوار

ونكتب فوق اشجاره سوالفنا

ونزرع سطحه وضلوعه

هوى واسرار

اوقف ارحم اعصابك

ارحمنى من الافكار

لاتتركنى دمعة حب

على ساحل هواك احتار

تعال نعلنها ثورة حب

تعال نذوق مره

لذة الاصرار


*(اهداب صوتكـ )*


يمتد حزني .. من الولادة للممـات
تمشـي علـى جروحـي الحيـاة
يا للـي تحـت أهـداب صوتـك
ســمــعــي بــــــات
غــنـــي .. أعــيـــش
غــنـــي .. امـــــوت
غني .. تحت سورك أنا أطلع نبات
ردي الــــحــــيــــاة
لا تتركيني .. في سجون الذكريات
يا قدر يتبعني فـي كـل الـدروب
يا تواقيع الاقامـة فـي الهـروب
يا سنيني اللـي خذتهـا الشمـس
فـــي رحـلــة غـــروب
كـانـت عـيـونـك وطــــن
كــانـــت شـــعـــوب
كـانـت عيـونـك مـــدارس
عـلـمـتـنـي الـــحـــب
فـــي عـــز الــحــروب



~ لوميني

لوميني ..لوميني

قولي للبشر كله

انتي ماتحبيني

يكفيني احبك انا يكفيني

اشعر في الهوى يكبر ويطويني

لوميني .. لوميني

هذا الحب في دمي وشراييني

مااقدر مااقدر اقطع في شراييني



*( ليش الحذر )*

لــــــــيــــــــش الــــــــحــــــــذر


ياما سحابة تخون توقيت المطر


لــــــــيــــــــش الــــــــحــــــــذر


ياما نجوم تموت من كثر السهر


لــــــــيــــــــش الــــــــحــــــــذر


ياما الربيع يمـر ويبكـي الشجـر


لــــــــيــــــــش الــــــــحــــــــذر


واحــنــا مــثــل كـــــل الـبــشــر


احــــــــنـــــــــا بــــــــشـــــــــر

~ أجمل ليل

شعرك ليل
أطول ليل
ممكن تملكه ..حواء
في دنيا فيها الليل ..يقصونه
بمقص ظالم
ما يفهم سواد الليل
شعرك ليل
أطول ليل !!


*( استأذنك )*


اســـــتــــــاذنــــــك لازم اروح


مااقـوى علـى بـاقـي الـجـروح


انـــت مـعــي غـامــض كـثـيـر


طبعـي الوفـا طبعـي الوضـوح


الـلـي يصـيـر بـعــدي يـصـيـر


مايخـاف ابـد صافـي الضمـيـر


يـــــوم الـلـيــالــي تـسـتــديــر


يــفـــرح وحــســـاده تــنـــوح


اســـــتــــــاذنــــــك لازم اروح


~ واحد من الناس

بكل طيبة العشاق اطلب ننتهي
سافر وغيب وننتهي
بتشوف ناس .. وتحب ناس
وتنسى وأكون بدنيتك .. واحد من الناس
كنت أتصور إني لك .. وانته عارف منزلك
جدّت ظروف .. وعينك تشوف
صرت بصعوبه أقابلك .. صرت بألم اشتاق لك
سلمت .. انا مالي غير الصبر
آه لو تدري بعد هذا العمر
إسمك إذا مرني .. يعطرني عطر
آه يا كل العمر
كون بمكاني وشوف عانيت شكثر
بتشوف ناس.. وتحب ناس
وتنسى .. واكون بدنيتك واحد من الناس



*( حروفـ الجرايد )*


يا اللي حبك قطع أنفاسي قصايـد
يا اللي ذنبك لوع حروف الجرايـد
انـــت وأنـــا اثـنـيـن ..
والـثــالــث هـــوانـــا
والــهــوى مـسـكـيـن ..
لـيـتــه مــــا لقانــــا
صدفه وحنـا صغـار .. صدفـه
الـهـوى لبـسـنـا عـطـفـه
والهوى مسكين ليتـه مـا لقانـا
والأمل (مقرود) يبكي فـي قفانــا
والحزن مرتاح كل حزنـه هدانــــا
وحـنـا بـــس اثـنـيـن ..
والـثـالــث .. هــوانـــا
والــهـــوى مـسـكـيــن
لـيـتــه مــــا لـقـانــا
انت أقوى منّي .. وأنـا اعتـرف
أنا خطوة نـار .. خلتنـي أجـف
بـــس مـصـيـر النار
يـقــولــون الـــرمـــاد
وانــــــت نــــــارك
غـيــر نـيــران الـعـبـاد
في وسط عيني أشوف انك تخون
واسدل جفوني على طول العيـون
يا اللي حبك صبغ الدنيـا ذنـوب
وبدل شموسي المنيره في الغروب
من طفولتنا .. أتوب ... وما أتوب

ّ~ الكلمة الأخيرة

بكل هدوء .. وبكل محبة
اسمع الكلمة الأخيرة
ما أبيك
وان رجعت .. اترك الديرة
وأسافر لغير ديرة
وبكل هدوء .. اسمع الكلمة الأخيرة
عرفتك والنظر خدّاع
صدقتك .. وطاوعتك
سلمتك شعوري بساع
واثاري صح كل اللي سمعته وشاع
اسمع الكلمة الأخيرة
ما أبيك
كلمة .. وانتهى الموضوع .. فكر تنسى او ترحل
شسوي .. وشحيلة المخدوع .. يعيد الكره من أول
اسمع الكلمة الأخيرة
ما أبيك



*( لغــاتـ )*


صمتي .. ذخيـرة وأسلحـة
وأنـا متعلـق فـي السنيـن
مثـل الصبـر لمـا يتعـلـق
فــي خـيـوط المسبـحـة
اللـي كتبتـه فـي حيـاتـي
صــار.. لازم امـسـحـه
ولازم أعـيــش الـهــم
حــتــى أشــرحـــه
حبّيـت فـي كـل اللـغـات
لغة اهتزاز الوردة وهي مفتحه
ولــغــة الـجــفــاف
بعـيـن غيـمـه مجـرحـه
حبّيـت فـي كـل اللـغـات
حتى لغات الأجنحة ..للأجنحة

~ الطفولة

يا ناس لا تهدمون السكة
والبيت القديم
يا يبه بيتنا حلو..نحبه مديم
. . . حرام الطين يصير مرمر
حرام الذكرى
تحت "الهيب" تتكسر
حرام التريك
يصير نيون
حرام الشارع الهادي. .
يصير مجنون
يا ناس لا تهدمون السكة
هذي السكة من قلبي
والبيت القديم
مسوّر بحبي
خلّوا نتفه من قلبي
أصبّر فيها احساسي


أراعيك
أنت الروح يا روحي على روحي أبديك
حبيبي ضعت أنا بــس فـين أراضـــيـك
صبرت الغـــضــــب حاولــت أراضيـك
سـو كل اللي يـرضيـك
حياتـي ودنيتـي فيـك
تكون الحزن .. أناديك
تكون اليأس .. أناديك
ومهما تكون لا يمكن أخليك
حبيبي أنـــت يا نفسي
يا لوني ويا صدى حــسـي
يا إحساسي في أمــــــــســي
يا كلمة أمل تنقذني من يأسي
يا كل الشوق
يا أحلى الــمر
أبي من وقتك الضايع
دقيقة ثانية وقفة
حنيت لك تــكــفى
ولون الفرحة يعرفني ولا أعرفه
حنيت لك تــكــفى
الجرح أنــا وأنـــت لي وصــفه
تعال اسألني وش فيك
تعال أقرأ بعيوني كل معانيك
تكون الحزن أناديك
تكون اليأس أناديك
ومهما تكون لايمكن أخليــــــك

لا تنادي
تتعب أنت لو تنادي
أنت في وادي
وأنا في غير وادي
لا تنادي ...
يا مزهب الأعذار
ماعندك عذر
كنت تتجنى وأسامح أشكثر
شاللي أحبه فيك
شاللي أفتكر
خوفي ...عذابي ..غربتي
عمري ..اللي صبرته ...عمر
لا تنتظر
الحين مو بيدي الأمر
لا تنادي
كنت تحسبني أجيك
بأول ندا تنادي علي
ما اسمعك لو روحي فيك
ما دام جرحي حي
نادي ..أنا أتجاهل نداك
أبعد وروح الله معاك
لالا تنادي
ضيعتني في زحمة أيامي
وأنا الولهان
كنت الأمان بدنيتي
وحسيت لا ما أنت الأمان
جرحتني
باسم المحبة والحنان
جرحتني
خليتني ألجأ إلى النسيان
لا تنادي الشوق
في قلبي هدا
لا صوت يوصلني
ولا حتى صدى
أنتهي صبري
وبدا. ردي. بدا

الحب المؤبد

محكوم بالحب المؤبد ... ما انام
وجودك يصدر الاحكام
رحيلك يصدر الاحكام
... وسكوتك يا بعد عمري
حكم من اخطر الاحكام
هواك احكام
هواك اعدام
هواك يلاحق ايامي مدى الايام
سلطه عيونك ... خذتني ... حاكمتني
جردتني من سكوتي والكلام
علقتني واتركتني
بين خيط الحرب ... وخيوط السلام
سلطه عيونك خذتني
شردتني ... حاصرتني ... شردتني
امنعتني لا انام
صادرت صبري ودواويني
بسم حكم الغرام
اتبعثر لما اشوفك ..
يرتبك في نبضي ايقاع الغرور
اتكوم داخل عيونك سطور
اتكلم في فتور
اتحرك في فتور
واتسلل عن عيون الناس
وعيون الحضور
اتسلل حق دفى صدرك عطور
يصعب التعبير عن هذا الشعور
يصعب التعبير عن هذا الشعور

دهمشي 04-25-2010 11:01 AM

كل الشكر للجهود الجميلة

فيلسوف الكويت 04-25-2010 04:43 PM

مشعل الفدغوش
جهود تستحق الثناء
يعطيك العافية ودمت متألقا على الدوام
هذا وتقبل مني أغلى تحية ... فيلسوف الكويت

ضامية الود 04-25-2010 06:20 PM

الف شكر لك علي الجهود

يعطيك الف عافيه

تحياتي

نوف الشموخ 04-27-2010 04:46 AM

كل الشكر
مشعل

تحياتي

عبدالعزيز الفدغوش 05-02-2010 09:02 AM

جـــهودك محل الثـــــناء والاجلال والتقدير
ولك في نوافذ العطاء المتميز وجود وتاثير

مشعل الحبلاني 05-26-2010 03:20 PM

ألف شكر لـــكـ

وموضوعكم مميزة جدا

اســـتفـــــدت مــــنـــه الكثير

رائـــــــع دائــــمـــا بــــمـــا تقدم

مـــــشـــــعـــل الــــــحـــــــبلانـــي

ذكرى الغالي 01-06-2011 02:11 PM

رد: ديوان الشاعر الكبير فايق عبدالجليل
 
سلمت يداك وذوقك الرفيع
تقديري واحترامي
لشخصك وطرحك
ذكرى الغالي


الساعة الآن 12:25 PM.

Powered by vBulletin® Version 3.8.8
Copyright ©2000 - 2024, vBulletin Solutions, Inc.
ظ„ظٹظ†ظƒط§طھ - ط¯ط¹ظ… : SEO by vBSEO 3.5.1 Trans by
Coordination Forum √ 1.0 By: мộнαηηαď © 2011

vEhdaa 1.1 by NLP ©2009