شبكة الشموخ الأدبية - ديوان الامير والفارس تركي بن حميد رحمة الله عليه

السلام عليكم ورحمة الله وبركاته
يوصي من خلالها الامير الراحل إبنه " عبيد " ( الامير الفارس المعروف ) بمكارم الأخلاق والحرص على الدين والعبادة . وهي من أروع ماقيل في شعر الحكمة والزهد والنصيحة في الشعر النبطي قاطبه . وبالتحديد أحد أبياتها الذي احتوى على ابلغ معاني الحكمة والنصيحة على الاطلاق , ويعتبر بمفردة ديوانٍ كاملٍ لشعر الحكمة لما فيه من جزالة بالمعنى وقوةٍ بالسبك يندر قولها , وقد تفرد بقوله الامير تركي ولم يسبقه عليه أحد من الشعراء لا من قبل ولا من بعد , وكيف لا ........ وهو العابد القائم الذي أمتلى قلبه بنور الايمان .

ياما حلا ياعبيد في وقت الاسفار ............. جذب الفراش وشبّ ضوّ المنارة
مع دلة(ن) تجذا على واهج النار ............. ونجر إلى حرّك تزايد عباره
في ربعة(ن) ماهيب تحجب عن الجار ............. لا منّ خطو اللاش ما شبّ ناره
النجر دقّ وجاوبه كل مرّار ............. مالفّه الملفوف من دون جاره
وأخير منها ركعتين(ن) بالاسحار ............. لاطاب نوم اللي حياته خساره
تلقاه في يوم(ن) يضيعن(ن) الافكار ............. يوم(ن) على المخلوق ما اطول نهاره
وقم في قصير البيت حشمه ومقدار ............. لو جار فادمح له ولو به خساره
ترى النبي وصّى على الجار لو جار ............. خذ الحذر ياعبيد عقب النذاره
رافق قويّ الدين حفّاظ الاسرار ............. ينفعك في يوم(ن) يجي به كراره
ترى الهوى والغيّ هن شرّ الاشرار ............. ومن داس عار الناس داسوا لعاره
جنّب رديّ الكار مافيه تعبار ............. مافيه من فعل المناعير شاره
جنّب عنه خلّه لقصّاف الاعمار ............. واحفظ وصتاتي يارفيع المناره
واسلم ودم بالخير يا طير غيمار ............. وصلّوا على المختار ما غار غاره
تلعب طرب :
تعتبر من أشهر قصائد الامير الراحل / تركي بن حميد على الاطلاق , وفيها الكثير من أبيات الحكمة والفخر بالشجاعة والفروسية .
ويذكر الرواة أنه قالها بعد عودته من محمد بن هادي وفشلهما في الاتفاق على نزول عتيبة صلحاً الى نجد , وكان الامير تركي قد جمع قومه يتباحث معهم في الامر فمر بهم راع يتغنى بالشعر عائداً من المرعى فجاء المطلع " تلعب طرب وأنا بنومي هواجيس " .

تلعب طرب وأنا بنومي هواجيس ................ ماسهّرك بالليل كثر الهمومي
أسهر إلى نامت عيون الهداريس ................ وبالليل اراعي ساهرات النجومي
أوجس بقلبي مثل دقّ النحاحيس ................ الله يلوم اللي لحالي يلومي
قالوا جهلت وقلت جهل(ن) بلا قيس ................ الجاهل اللي مايعرف اليمومي
أشوف عدلات الليالي مقابيس ................ ولا احد(ن) من الدنيا عظامه سلومي
تضحك وتخفي لك خفيّ الهناديس ................ تفطر لها يوم(ن) ويوم(ن) تصومي
إعمل وتلقا وافهم العلم بالقيس ................ دنياك لو زانت تراها نقومي
إلى توافق مشّور السوّ وابليس ................ تبر منه وعزّ ربي يدومي
اربع سنين ودمع عيني أماريس ................ العين تسهر كنّ فيها هزومي
بالليل اصالي حاميات المحاميس ................ والصبح الاوي كل قبّا(ن) قحومي
وإلى ركبت معالجات المضاريس ................ يبرد على قلبي لهيب السمومي
قبّ(ن) تنازى بالنشاما كراديس ................ والطير في روجهاتهنّه يحومي
والعزّ فوق معسكرات السواديسّ ................ إلى طلبت اللي بالاشيا رحومي
إلى سمك عجّ الرمك بالملابيس ................ المسعد اللي حظّ ربعه يقومي
وشلف(ن) تركبّ بالعروق المناسيس ................ وقحص المهار وكلّ قبّا(ن) قحومي
صوابنا بالميل غمق(ن) إلي قيس ................ وطريحنا في مثبره مايقومي
إن جنّ بنا مثل النعام الأماريس ................ لا خفّ عجل(ن) مع رقاق الحزومي
كلّ القلم من كتبنا بالقراطيس ................ وركابنا من كثر الأقران تومي
لومي على اللي ينقلون العبابيس ................ وأهل الفرنج وكلّ رامي لحومي
إستلحق اللي يطلبون النواميس ................ اللي من الأقصين وأدنى اللحومي
إن جن بالميدان مثل الدواويس ................ وطار الغطا عن قانيات الرقومي
عرّج باهلهن كنّهن القرانيس ................ على الطريح مصوبرات(ن) كظومي
لا خير في كثر الحكي والتماليس ................ هرج(ن) بلا فعل(ن) يجي به وهومي
من لايدوس الراي من قبل ماديس ................ عليه داسوه العيال القرومي
ومن لاي يقلطّ شذرة السيف والكيس ................ تبدا عليه من الليالي ثلومي
والقصر مايصلح على غير تأسيس ................ ومن لا تعلّم ماتسر العلومي
ومن لا خذا الدنيا بميز(ن) وتقييس ................ مثل الذي يسبح بليل(ن) يعومي
والشيخ من يعطي الفقارا المفاليس ................ يبدّل الساعة بعزّ(ن) يقومي
والحر لا دبتّ عليه النواميس ................ يشهر وعن دار المذلة يشومي
وإلى اكترب من بعض الاشيا نسانيس ................ إعزم ولا بدّ الفرج بالعزومي
باب الفرج لبسك نظيف الملابيس ................ ينجيك بأيام الكرب والزحومي
يجلي صدا قلبي ضبيح المهاريس ................ لاقام شرّاب القهاوي يعومي
ودلال فوق النار دايم مجاليس ................ أكرامهن حقّ(ن) علينا لزومي
من صنعة الصبّة وخمس التخاميس ................ بريّة(ن) يعمل بها كلّ يومي
وبهارهن هيل(ن) بليّا حواسيس ................ كيف(ن) يعدّى للنشاما القرومي
عدّه لحماي العياد المراويس ................ والا الحصان اللي بقينه وهومي
حتى يزين لنا المثل والتوانيس ................ والكيف طاب لمن يفكّ القحومي
وصلاة ربّي عدّ رمل الطعاميس ................ على شفيع الخلق يوم اللمومي
الحرب سقم العين
قصيدة موجهة من الامير الراحل تركي بن حميد الى الامير الراحل محمد بن هادي .... ذكر من خلالها الامير تركي جنوحه للصلح في السابق وعدم تحققه , ويتوعد فيها بالحرب ويتفاخر بقومه وشجاعتهم وقوة بأسهم .

ياراكب(ن) من فوق بوّاجة الخلا ............... من البقل مابانت مواري فطورها
زعول(ن) من الراكب جزوع(ن) من العصا ............... خطر(ن) على فزّاتها قصم كورها
ركّابها من ربعنا خابرينه ............... دليلة الظلما الى غاب نورها
انص بن هادي ريف هشالة الخلا ............... ريف الهجافا في ليالي عسورها
في مجلسه تلقى علوم(ن) طرايف ............... وحيل(ن) تطاها كل يوم(ن) قدورها
قل له طلبنا الصلح منكم ولا حصل ............... دنياك مايبقى بها الاّ صبورها
ترى الحرب سقم العين ماهو ب راحة ............... تسهر ويقزا نومها ب حجورها
والى حربتونا فحنّا حريبة ............... ماحن بشيّان(ن) قصار(ن) شبورها
تضدوننا بالكثر وحنا نضدّكم ............... باكوان منّا ما تجبّر كسورها
نقفي وحنّا عيننا في حريبنا ............... نعقّب لهم نمر(ن) تعاقب سبورها
ونردّ سرحات الخلايع مشايع ............... كبار القفاير نابيات ظهورها
اما نوافق غرّة(ن) تتفق لنا ............... والا مقابيس(ن) تقدح شرورها
يرجا لفزعتنا الى جا كميننا ............... بدهم الفرنج اللي وساع(ن) قرورها
كرامة(ن) للي تشوّق لحربنا ............... لو انتحوا عنا بعيد(ن) نزورها
وما اذمكم يا ربعنا نعم(ن) بكم ............... أنتم سباع الهيش وحنا نمورها
وأنتم كما ضلع(ن) صبور(ن) على الشقا ............... وحنا حرارّ(ن) في مشاذيب قورها
ساعة تجيكم خيلنا عارفينها ............... معاريض ماهي معطيتكم نحورها
وساعة تجينا خيلكم عارفينها ............... نحدّ السبايا لين تركب وعورها
كم سربة(ن) دهما دهوم نجرّها ............... تحاكوا بها غيّابها مع حصورها
الى نسيتوها عليكم نجرّها ............... تموتون وانتم مانسيتوا حرورها
تصبح مداس الخيل من غبّ كوننا ............... تشبع حناديها وباقي نسورها
ماينفع الا الصدق والفعل والنقا ............... وباقي الحكايا بايهات(ن) أمورها
عاداتنا لطم المعادي على النقا ............... والا العميلة راتعة ما نذورها

دنيا همال
قصيدة من قصائد الزهد والحكمة
فكّر وناظر يامحمد ترى الحال ............. نفسي وتاليها مع الله خبرها
العين كاين لها عن النوم عذّال ............. تسهر وغاد(ن) نومها عن حجرها
والكبد ماتقبل من الحلو فنجال ............. والمرّ لو هو عشرق(ن) مانقرها
دنيا هيال ولا لحقنا لها جال ............. وأزريت اميّز سهلها من وعرها
كان اقبلت ياحلو هاك التبهلال ............. وان ادبرت سوّ(ن) على اللي حضرها
ماظنّ فيها واحدن(ن) داله البال ............. إحفظ لدينك وانتبه عن خطرها
تراه مثل الفيّ لابد ينزال ............. والشمس هي ويّا القمر من فكرها
الحق ينكر والتفاخر بالاموال ............. لاهين في غفلاتهم في دوّرها
كم فرقّت من دولة(ن) حلّ واجيال ............. والى ومرها الله عطتهم نحرها
فعّال نو الخير لاموه الانذال ............. كثرت تخاليف العرب في صورها
يالله ياعالم خفيّات الاحوال............. ياللي ذنوب العبد لا شا غفرها
كم واحد(ن) يمشي مع الناس ............. مهذال يرعى سواة العاذرة من بقرها
لاشاحنه علم(ن) ولا وراده حال ............. ولا يميّز وردها من صدرها
ثوب النقا مايرخصه لبس الاسمال ............. سلم الرجال اللي تلامع شهرها
إن كان ما انت ب في معانيك حمّال ............. عمل الردى يهويك مظلم حفرها
ذا قول من عدّل غريبات الامثال............. بيوت(ن) عسيرات(ن) لمن لا قدرها
أنا احمد الله بّدل الشمس بظلال ............. وهانت مصاعبها ونقطف ثمرها
ماهمنّي دنيا ولا همنّي مال ............. الرزق ياتي مثل هاتف مطرها
شفّي ومقصودي من الخيل ............. مشوال شقرا نواصيها كثير(ن) شعرها
شفّي عليها كان هو زعزع المال ............. ومن الهنادي صارم(ن) في ظهرها
وبالكفّ من غالي المطارق هوى البال ............. يروي بحزّات اللقا من حمرها
ونجرٍ توالي الليل تسمع له اعوال ودلال ............. يلقى الكيف من هو نحرها
بريّةٍ يطرب لها كلّ شغّال ............. والزعفران مع العويدي ذعرها
تهدى لماضين التجارب والافعال ............. زيزوم عيرات(ن) تعايل جررها
وتهدى لمن يثني نهار التجيوال ............. مودع جياد الخيل تركب وعرها
والثالث اللي بالقسا يرخص المال ............. له ربعة(ن) دايم تناطف سفرها
وصدّه عن اللي مع دروب الردى عال ............. يمناه عن طيب المعاني قصرها
وصلّوا على من صار للحقّ مرسال ............. عداد ما خضرّ ورق في شجرها

- جواد ضالع :
يتوجد فيها الامير الراحل / تركي بن حميد على فرسه المصابة في ساقها بعد إحدى المعارك , وينهيها يتوجيه النصيحة لابنه عبيد .
من يوم صندوق الحشا بالخفا بان ............. والعين سهرت بين همّ وهوجاس
البارحة جفني عن النوم سهران ............. كنّي عليل(ن) مسهره بعض الأضراس
على جواد(ن) ضالع(ن) غبّ الأكوان ............. فيها اختلط حبل هو اليّاس
جندرتها من صوف سالك(ن) وريمان ............. وانا لها عن لذة النوم حرّاس
ماني مجندرها على زود الاثمان ............. إلا ليوم(ن) فيه الارياق يبّاس
لا جا نهارن(ن) فيه روغات الاذهان ............. باغي عليها باوّل الخيل نوماس
عرج(ن) إلى ما طبّحن خلف الاظعان ............. والسوق مابين الأجاويد مقياس
ياعبيد قيّس ماعلى الروح ضمّان ............. رزقك مع اجلك خط ّ في طلح قرطاس
ما خط ّ لك ما فات شوف(ن) بالاعيان ............. وبعض الأوادم مامعه ميز وقياس
لا حاسد(ن) يمنع ولا يرزق انسان ............. إلا بتدبير الصمد والي الناس
ثم أنصح الباقي ترى القصر خربان ............. ما اعتزّ قصر(ن) ما يوثّق على ساس