أقسم بمن كمل أخلاقي وسواني=مازعزعتني حروفٍ لك مسويها
يا تايه الرأي حدك لا تبلاني=إحسب حسابك إذا شيمتك مغليها
ياهيه يإللي ضليع بكسر الاوزاني=منك القصايد ترى تشكي قوافيها
لو إنتْ رجال ماحطيت يافلاني=رأسك برأسي وأنا حرمه تباريها
تشكي وتبكي وانت المجرم الجاني=مدام هذي سواتك كيف امشيها
الكذب في سلمك له أشكال والواني=شيطان كل الحجج بالزيف ترويها
تجرح وتظلم ثم بعدها ترجاني=منك الجروح اشلون اقوى ادآويها
اتذمني يافلان وانت اقرب اعواني=منك الاهانه كيف اقدر اعديها
ماتستحي منت مما قلت خجلاني=لا تدعي بالرجوله منت راعيها
منك ومما إبتلاك الله عافاني=عالج من الملعنه نفسك وداويها
ذكرى أنا المجد لي والعز عنواني=يالعنبو حي حيك ماتقاويها
أنا قويه بطيب اصلي وإيماني=والعزوه إللي تموت ولا تجاريها
والله ماتآصل شموخي..خبت يالداني=خابت مساعيك وأفعال مسويها
خسيس هايف عليل ومامعك ثاني=بعض الاوادم عكس معنى اساميها
بانت حقيقتك ولا تحتاج برهاني=وبارت بضاعتك من بالكذب يشريها
إفهم إذنت حر منطق لساني=بنت الرجاجيل تخسى ماتوطيها
هذا هو الرد عن بعض الذي جاني=منك ((ومن شب نارٍ يحترق فيها))