قصيدة في الشيخ بن باز - ناصر القحطاني
( إبن باز )
الموادع به من الحنظل ولون الشامه
وارتحالات الزفير وذاريات الكنه
والليالي كسب وآخرة المكاسب خامه
والبن ادم بين ضحك وبين دمع وونه
كيف نبكي لا فقدنا شيخنا العلامه
كيف نزعل والصواب اللي فجعنا سنه
الكفيف المبصر الشامخ قصير القامه
بشروا به سندس الفردوس وأهل الجنه
عالم يا كثر ما أبحر لامته وأيامه
وأمته به كانت لباب السما ممتنه
حالم ما كانت لنفسه جميع أحلامه
وش خذا منا وحنا وش خذينا منه
كم عنى للتايه اللي ما اهتدى لاسلامه
كم ترك بالخلف قنطار الذهب له رنه
كم جلس يقرا نفوس العالم اللوامة
كم وقف للمستغيث اللي كبر به ضنه
مرةٍ شفته و شفت قلوبنا قدامه
كل ما افتى عود الجني لماكر جنه
ما حلا حتى اعتدال الشيخ في هندامه
يوم يقبل عطر يجهر به .. و عطر يكنه
زعفرانٍ باذخٍ في مشلحٍ و عمامة
كنه أطهر صبح و لا ما اعرف وش كنه
الموادع شين و الشامخ قصير القامة
بشروه بعشرة قد بشروا بالجنة