ذاك الهوى مات بسببهْ وتجافيه=ذاك الحبيب اللي جروحي شكت له
مايوم عنّيته وأنا دايم آجيه=درب العنا رجليه لا ما مشت له
أفرح ليا شفت الفرح جا بعينيه=كن السعاده جات عندي وجت له
لا ضاق يزعلني وأنا ماعرف ليه=ويضيق صدري والعيون إسهرت له
مَن يزعله مكروه عندي ولا أبيه=وعاذرك ياقلبٍ تمنيت قتله
أكره ماشوف إن شفت ناسٍ حواليه=وأكره حروفٍ لا طلعتْ ونطقت له
أغار من غيري ليا جاب طاريه=وأغار من ريحٍ لفَت وإلفحت له
بذر المحبه من معزتهْ مِسقيه=ورد الغلا والحب فيني نبت له
صَده (خبَر عاجل) وعيني تَراعيه=عَبر (قَناة العَذل) يوم إفرحتَ له
مَات الغلا يوم الغَلا بيَن أيَاديه=وذيَاب حِزني مِن ودَاعه دوتله
قال الوَداع ولا قَويت النَظر فيه=وقفّيت عَنه وخَافقي مِلتفت له