<div>منذ نعومة اظافري وأنا استخدم نظام الويندوز
ولكي اصدقكم القول ماعرفت ان فيه انظمة غيره الا من سنتين الظاهر

نعم، تهورت وشريت ماك .. بعد إقناع شخص عزيز علي بإقتناءه، وبعد ماطمني بأنه بيدبرني ويضبطه لي إذا شريته .. وللأمانه جتني لحظات تحسفت فيها لكني تشجعت وواصلت المشوار

في البداية خلوني أقول لكم رأيي وإنطباعي عن الجهاز حتى الآن ، كثير يسألوني عنه وعن أستخدامه وكثير يبون يحولون بس مترددين من البرامج والاستخدام وهل الجهاز صعب ومدري ايش .. في نظري هالشيء يعتمد على إستخدامك للجهاز .. يعني مثلاً واحد مايستخدم اللاب توب الا عشان يتصفح الجرايد .. طبيعي ماراح يفقد ولا برامج في الويندوز لانه بس يستخدم المتصفح .. بالنسبه لي أنا استخدامي يعتبر استخدام جائر، ( يعني : جفاسه، كرف، تحميل، تصميم .. ) ما اطفي الجهاز أبد واستخدم فيه برامج كثيره وأخر جهاز كان معي حفرت كيبورده الين ما بقى الا شوي وأدخل على المذربورد .. وعشان أكون معكم صريح أكثر، في اخر الأيام حسيت أصابعي صارت تلمس الويندوز

نجي لنوع الجهاز اللي شريته
ماك بوك برو | MacBook Pro



تقدر تطلع على موصفات الجهاز وشكله من الموقع الرسمي : هنا

إستجابة الجهاز

الجهاز للأمانه سريع في تشغليه وتطفيته، ماتحس فيه ولا تجلس تنتظره، لذا أقيمه بأنه سريع التشغيل واستجابته عالية (ممكن يختلف الكلام مع اختلاف موصفات الجهاز)، هذي نقطة في صالحه لكن برضو سرعة الإستجابة ممكن تحصلها في أي جهاز جديد عالي الموصفات ، بس الشيء اللي لفت نظري وعلى طول حبيته وتعودت عليه هو ( الماوس باد ) .. استجابته لليد رهيبه .. وأهم شيء أنه يتحرك بـ التوتش زي الايباد والايفون يعني



واجهة الجهاز والإختلافات الموجودة فيه

كنظرة أولى للجهاز وواجهته بتحس أن أهلك حاطينك في السوق وناسينك .. بتحس كل شيء تغير عليك وأنك ضايع وحوسه .. لكن بعد دقايق بس بتكتشف أنه زي الويندوز أو أي نظام تشغيل غيره لكن مع أختلاف المسميات والأماكن، يعني على سبيل المثال : بدال مايكون شريط اللغة والساعة تحت صارت فوق، بدال كلمة أبدأ حطو لك فايندر مثلاً، بدال برامج كتبوا لك تطبيقات

تثبيت البرامج

تثبيت البرامج ممكن يكون عن طريق تحميل البرنامج مباشرة من الموقع وبعدين تسوين له ( install ) واللي بشكل عام قريب جداً من طريقة الويندوز .. أو يكون عن طريق الـ App Store وهذي ميزة حلوه مهيب موجودة في الويندوز .. ممكن تفتح الاب ستور وتجلس تتمشى فيه وتشوف التطبيقات اللي تعجبك سواء من العاب أو برامج او تطبيقات اجتماعية ( تويتر, فيس بوك ) وبالضبط مثل الاب ستور حق الايباد والايفون ونفس اليوزر اللي تستخدمه هناك تقدر تستخدمه هنا وتشتري وتحمل وتسوي اللي تبي ( اضغط هنا لشرح طريقة التسجيل في الاب ستور )

البرامج اللي كنت أستخدمها في الويندوز وبدائلها

هالنقطة كانت مخوفتني كثير خصوصاً إني أحب يكون الجهاز اللي أستخدمه فيه كل البرامج والإضافات اللي أنا احتاجها واستخدمها، عشان كذا يسموني أخويائي : عدو الفورمات .. لكن اكتشفت كثير برامج تكون تلعب على شارعين على قولتهم، تسوي البرنامج لكل أنظمة التشغيل لأن هدفها يكون ربحي أو الإنتشار والسمعه، لذا خلونا نأخذ لنا جولة بسيطة على بعضها

ادوبي | Adobe



كل برامج الادوبي موجود منها إصدار للويندوز والماك، الادوبي ريدر ( حق الـ PDF ) والادوبي فوتوشوب والإلستريتور والدريم ويفر والبريمير، هذي وغيرها كثير موجودة للنظامين ولكن بشكل غير مجاني، لذا الله يخلي التورنت

برامج التحميل



متوفر للماك برامج تدعم التحميل المباشر وبرامج ( تسريع التحميل ) على قولتهم ، والأهم برامج التورنت الموجودة في الويندوز موجودة في الماك وتقدر تحملها من الموقع الرسمي حقها، مثل الـ Utorrent

مشغلات الفيديو



كثير من المشغلات الموجودة للويندوز موجودة للماك بعد، مثل VLC, RealPlayer وفيه مشغلات حلوة ثانية مثل Movist, MPlayerX

برامج تصميم وتحرير الصور والمواقع



بالنسبة لتصميم الصور فمثل ماقلنا قبل شوي، تقدر تستخدم الفوتوشوب أو أبحث عن بدائل له ( أنصح بإستخدام هالموقع الرائع : Alternative To ) بخصوص برامج تحرير الصور وعمل الشروحات عليها ففيه برامج مثل SEASHORE, Skitch

اما بالنسبة للتعديل على المواقع فاللي يستخدم برامج تعتمد على الـ HTML مثل الأدوبي دريم ويفر أو المايكروسوفت فرونت بيج (FrontPage) يقدر يستخدم في الماك الدريمويفر (Dreamweaver) أو KompoZer أو NVU

وفيه غيرهم برامج لكنها تكون في الغالب خاليه من التعامل مع أكواد HTML ويكون التحرير فيها سهل ومهوب متطور وبقوالب جاهزه، مثل برنامج Freeway, RapidWeaver, flux, iWeb

برامج الحماية



برامج الحماية متوفرة للماك مافيها كلام ، فيه برامج مشهورة في الويندوز وتركب على الماك مثل الكاسبر سكاي Kaspersky, AVG .. وفيه غيرهم برامج كثير

المسن



مالي استخدام يذكر للمسن خصوصاً أن مواقع الشبكات الإجتماعية والجوالات الجديدة خلتنا شبه نستغني عنه .. موجود للماك المسن الرسمي من موقع هوتميل لكني جربته ومدري ليه ماحسيته حلو وما ارتحت له .. فيه برنامج ثاني اسمه aMSN ويقال أنه كويس لكن ما أقدر احكم عليه لأن استخدامي جداً قليل .. وأعتقد ماراح يكون بجودة المسن الموجود على الويندوز

ضغط الملفات



طبعاً كلنا نحتاج برامج ضغط الملفات، لأن مثلاً لو عندنا مجلد في الجهاز مليان ملفات مهمه، ماتقدر ترسله بالبريد أو ترفعه على موقع رفع إلا لما تحطه في ملف مضغوط .. موجود للماكنتوش برنامج ضغط ملفات مجانية مثل الـ WinZip, StuffIt Expander

<font size="4"><font face="Arial">المتصفحات



تقريباً جميع المتصفحات تركب على الماك ( فايرفوكس، قوقل كروم، اوبرا ) وطبعاً السفاري يجي متصفح إفتراضي في الجهاز .. حاولت أحمل متصفح الإكسبلورر 9 من موقعهم الرسمي لكن رفض لأني ما أستخدم ويندوز .. ممكن فيه طرق تحايل تخليني اركبه لكني للأمانه مادورت .. بالطقاق، اللي مايبيني ما أبيه

---

lug,lhj : hghkjrhg lk ,dk],. Ygn lh; lug,lhj : hghkjrhg lk ,dk],. Ygn lh;