المجد من يوم سلطان إنطفى نوره
صار ايتقهوى الهموم ويقدع أحزانه
وعيوننا لو تهل الدمع معذورة
الشعب كله تقول أبناه وإخوانه
على الوطن حط ليل الحزن ديجوره
وألقى عباته على دوره وسكانه
ساعات أحاول وأحث الشعر وبحوره
يادوب جادت لي بحوره وقيفانه
مات الكريم النبيل الفذ الاسطورة
أكرم رجل في الزمن هذا وسلطانه
فقيد الأمة . . حكيم العصر . . دكتوره
بحر الكرم . . هامة التاريخ . . عنوانه
سلطان من كثر ماينفق بميسوره
للجود صارت علامة بين حجانه
لو عدّوا أكثر عطا في كل معمورة
الناس في خانة وسلطان في خانة
سلطان فخر الزمن لو تكثر اعصوره
كل الميادين ماجت ربع ميدانه
أفعال سلطان بين الناس مذكورة
والعالم ايعد أبو خالد من أركانه
ومدات كفه ماهيب لناس محصورة
في كل بقعة وشبر ايهل ودانه
وأمجاد سلطان للأجيال مذخورة
حر(ن) ينومس بمخلابه وجنحانه
وإن غاب أبو خالد الإنسان أخو نورة
ماغاب يبقى بمعروفه وبإحسانه
له سيرة(ن) في قلوب الناس محفورة
في كل موقف عظيم ايبين برهانه
وفي كل مشروع خيري يتضح دوره
يالله عسى جنة الفردوس مسكانه
يحبر مع الأنبيا والروح مسرورة
ويفوز في رحمة المولى وغفرانه
وإن مات أبو خالد الإنسان الاسطورة
مامات موجود بأفعاله وبإحسانه