أنتْ تعتقد إني وَلِه أو إني لشوفك شفوق؟!=ما تدري إني هايم و دايم يرفرف لي جناح
جناحي هو كرامتي ماغير للعليآ سبوق=ما يرضى بالذله ولا يارد إلا على قراح
من يبدي وده يبتدي من صافي احساسه يسوق=وينسى كل المغريات ويعتمد نهج البواح
أنا ما ني بْعتمة ظلام أنا في بزغتي شروق=واللي بغاني يستعد في موعدي وقت الصباح
من مد يد الود مديت آنا له قلب ٍ صدوق=وعهدي له وثّقت به إخلاصي مع عشق ٍ مُباح
إن رقْت له في جانبٍ كله على بعضه يروق=وكل شي ٍ بالمحبه ينضوي تحت الكفاح
ومن مشى بدرب الغرام يتابعه عاذل يعوق=يحاول يفشل خطته بكل وسيله أو سلاح
الشوق يرفع همتي والوصل صاين لي حقوق=لاغدر يرقى لقمتي ولا هجر يسبّب لي جراح
أنا كذا ماني بْكذا مابيني وبينك فروق=الفرق واحد إنما من العنآ ولّى وراح
يكفيني إني بالنظر تشوفني قمّه وذوق=وآشوف نفسي فيك مثل توأم ٍ له ارتياح
شوفي وشوقي لك نهم لو بيننا خمسة حلوق=من يرضى جعله للرضا ومن يزعل جعله للصلاح
الزلزله إذا انزلت يسبقها رعد ٍ مع بروق=والغصّه اللي تحتضر يجيها إطلاق السراح
إنتْ تعتقد إني وله أو إني لشوفك شفوق ؟!=لا والله إلا مستعر من عشق ٍ جاني بآجتياح.!

جوهر الراوي .!