يجفلني صرير الباب ..وأقول بخاطري انتَ ومعك أخبار غيّابي
واتسابق انا وقلبي واقول احباب
لفوا مثل المطر والغيم
ودقوا بيدهم بشويش .. خافوا يزعجوا ابوابي
وأضم الباب ملهوفة
ولا القا سوا اخشابه الرطبة
بكت من شهقتي
ولمّت خيبة اتناثرت مني على بابي
*****
وش عليكم !!
مهما درب البعد طوّل .. نحتريكم
مهما تقسوا او تغيبو
نعتذر للقلب عنكم ولانلوم ولانعاتب
عذرنا إنـّا حبايب
وكل شي غالي علينا .. دام هو جانا بإيديكم
وش عليكم !!
*****
ممكن طلب
انسا الزعل خلي العتب وخلنا نعيش
العمر ماهو مرتين
لاتقول كيف .. لاتقول ليش !!
الله كريم
مادمت يمي وفيك قلب .. صافي ويحب
بكرة تزين
*****
وش عذرهم
جانا الشتا.. وهم مو هنا
ونحتاجهم
وش عذرهم
أكبر انا .. وتمر سنة
من دونهم
لاعذر يوصل أو رسالة ولا اتصال
يجيبهم
الله يجازي قلوبهم
يابخلهم
****
ياصاحبي
جانا الشتا وجانا مطر
راهي وكثير .. ونقول خير
والخير عندي رجعتك
مثل الشتا
ماغاب الا كم شهر
والحين رد
وانت علامك مارجعت
يعني يصير!
*****
الساعة كم
الفين جرح .. والفين هم
الساعة موت
ورجل الثواني
كسرت قدمها. . عيّت تفوت
وعيني عليها.. .تبكي عشاني وابكي معاها
من دون صوت
****
يدق الليل شباكي
وانا... استجدي الغفوة
يقول انتي يامسكينة
من تحاتين؟
تراه الصبح عالحروة
متى تنامين؟
واقول ان جبتهم بالحلم
انا اوعدك واحلف لك
انام الحين
****
يعني شلون
كذا نقضي العمر اغراب
وكل واحد وله ديرة
كذا نبقا بلا احباب
نبدّل قلبنا بغيره
كذا ونموت
بليا صوت
ولانشكي وجع وغياب
نقول لروحنا خيره
ياقلبي فضها سيرة