نلوم الوقت ونعلق خطانا بـ مشجب الايـام
نبرر ضعفنا دايم بـ قول ضروف ماترحـم
.
ونقضي وقتنا نهرب من الواقع إلى الأحلام
عسا بـ الكذب لو صدفه نحب وشملنا يلتـم
.
وإذا شحّ اللقا نفتح شبابيك الوصال أوهام
يجوز لـ من فقد لـ الـما من الموجـود يـتيمـم
.
نعيش الكذبه البيضاء بأن اللي نبيه ختـام
وبكـره يبتسـم وجه الزمان بـ وجهنـا مرغـم
.
ولا نلقا سوا خيبة تسوق بـ دربها الأقدام
ندوٌر لـ الفرح موعد ولـِ جروح القلب بلسـم
.
خطاوي العمر تسبقنا وعامٍ يقتفي له عـام
مابين الحزن والفرحه ، وبين الحلو والعلقـم
.
نطيـح ونوقـف ونرجـع نطيـح وحظّنا ماقـام
أفـا ياحظّنا المايل متى من طيحتـَك نسلـم ؟
.
حظوظ الآدمي أرزاق ماتشـرا ،، ولاتنسـام
كريم الله هو يعطي ، وهو يمنع ، وهو يعلـم
.
لنا آمااال نودعهـا بـ يـد اللي أبـد مانـام
عساه فـ يوم يرزقنا ونرضا باللذي يقسـم
.
بـ يومٍ بـه صحايفنا تجـفّ وترفـع الأقلام
وعن كل الذنوب اللي جناها ضعفنـا نكرم
.
هناك نعيش مانشكي من الفرقـا ولاننضام
ويجـزا كلٍ بـ صبـره ..سعيد بـجنته منعم
أحلام مؤجلة
سنابي وانستغرام - ahlaami2
تويتر - ahlaami