يرفرف خافقي وترف عيني = وذا معناه به علمٍ يجيني

يكدر خاطري والعالم الله = خبير الغيب رب العالميني

هو اللي عالمٍ بالكون كله = وكتب رزقي مع أجلي في جبيني

اسأله وأرتجي عطفه ولطفه = يساعدني بدنيايه وديني

يأمرني على الطرق السليمه = ويكفني شرور الحاسديني

ويجبر من شقا وقته غدر به = وزاد به التوجد والحنيني

سبب شخصٍ خذا القلب وغدا به = وليفٍ لي معه مدة سنيني

تبادلنا المحبة والمعزة = أبيه وهو بعد قلبه يبيني

على وضح النقا والكل منا = مايصغي في كلام الحاقديني

ولاكن الزمان الشين فرق = وشتتنا وحنا غافليني

نحسب الوقت دايم مايتغير = ولا تقسى الظروف ولا تشيني

ولاكن وقتنا الخاين غدرنا = وجه غارةٍ عن غارتيني

وخلا كل واحد له بديره = مهو بالكيف غصبٍ مجبريني

وأشوف العين ماهي مستقرة = ترف بكل ساعة مرتيني

وقلبي فيه هاجوسٍ يزوره = ياشاغل خافقي في كل حيني

وأقول أخاف به شيء جراله = عسى ما باس في موض الجبيني

قطع حتى الرسايل ماتجينا = ولا علمٍ يجي مع طارشيني

ولا أدري وش جراله في غيابي = وقلت أصبر وخلاقي يعيني

عسى الله من عنا وقته يجيره = وأنا ربي على الصبر يهديني

يرفرف خافقي وترف عيني = وذا معناه به علمٍ يجيني

يكدر خاطري والعالم الله = خبير الغيب رب العالميني
مبارك الطومي العنزي