أبدا بسم اللي كل مؤمن ترجّاه=يرجي ثوابه والمخاليق ترجيه
هو ربنا القيوم لا غيره إله=الخالق العظيم للكون ومنشيه
من طاعه يسعد دوم ويفوز بِرْضاه=وتحل عليه الرحمه ساعة يلاقيه
اللي يصلي الفرض خاشي من الله=يبشر بجنّه مع نعيمٍ بيآتيه
ينعم عليه المولى بالفضل يجزاه=يغفر له ذنبه أوله مع تواليه
الرابح اللي يتبع الحق يتلاه=والخاسر اللي يتبع ابليس غاويه
ياربنا ارحم عمنا اللي فقدناه=يوم الأحد عشرين شوال ناعيه
أحمد بن دوجان ضيفٍ لمولاه=وانت الكريم وندري إنك بترضيه
لو العمر يُفدى بكل غالي أفداه=حتى بروحي والله إني بأفديه
أبو سليمان مطلق حجاج من جاه=وراعي الفزعات باللي قدر فيه
في جنة الفردوس يا ربي سكناه=ولعفوك المحبوب يارب تدنيه
يا كبرها الخساره يومْ انْ خسرناه=لكن ما ينفع البكا يوم نبكيه
الموت حق وكلنا ما جحدناه=وكاس الموت داير والكل ساقيه
الخفجي جَزْعت في وفاته وتنعاه=وعياله وارحامه وكافة بنيخيه
يا كيف آعبّر عن شعوري وفحواه=وكل القوافي في قصيدي بترثيه
له عندنا قدر ومعزه مع الجاه=والحزن خيّم كيف نخفي خطاويه
ما آنساه والله دامني حي ما آنساه=والموت ما يمحي عن البال طاريه
الموت يهدم لذة العيش وهْناه=لكن آمنا بخالق الخلق باريه
والعمر وان طوّل على غير مشهاه=يجيه يوم يثبّته ثم ينهيه
سليمان ابوك ايّاك إيّاك تجفاه=دعوه من قلب صادق ترى تهنّيه
ويا نايف ما يحتاج أنا آسدي لك وْصاه=هذا أبوك الغالي ملزوم تكافيه
وياآم سليمان يجبر مْصابك الله=مْصابك عظيمٍ لكن الصبر يبريه
ويا مالكه دمعك على الخد مجراه=حزنك عميقٍ على غالي فقدتيه
أدري بحزنك حتى قلبك تعداه=صدمه قويه فوق طاقتْك تحويه
وباقي بناته كفكفن دمع مرثاه=ترى الدموع الزايده حيل توذيه
كلٍ يموت ويُلحد بقبر يقداه=يصبح للصالح روضةٍ في مواريه
وهذا اللي لْغالينا إحنا نتمناه=قولوا آمين ( الله بالخير يجزيه )
وزيدوا الصلاه على النبي خاتم انباه=شفيعنا يوم الحشر عند واليه
محمد اللي طاع ربّه ولبّاه=واختم كلامي كالبدايه وأنهيه
سبحان ربي بلسم القلب ودْواه=ذو الفضل والإحسان مع كل تنويه

:
جوهر الراوي