الملحمة الوائلية
للشاعر الاسمر خلف الجويعان من ولد سليمان من عنزة
الأسمر الجويعان من الجعافرة من قبيلة ولد سليمان من ضنا عبيد من ضنا بشر من عنزة وةهو من شعراء عنزة وصاحب أحدى الملاحم الوائلية التى نفتخر بها وكان ايضا رواية مع شعره فهو يحفظ القصص وقصائدها رحمه الله
يالله يامشفي الجسوم العليلة **** ياللي خلقت من العدم كل وجدان
خلقت مخلوق وعينك تخيله **** مابين كاف ونون كونت الإنسان
انت الذي رزق الخلايق كفيله **** يارافعٍ سمك السما دون عمدان
أدعوك باسماك العظام الجليلة **** يالجود يالماجود ياجزل الإحسان
ياواحدٍ ماغير عفوك وسيلة **** لقدرتك عبدك فقيراً ومندان
احمدك يالمعبود ليه قبيلة **** ربعي هل الجدعا سلايل سليمان
قصيرهم ضل المعزة مقيلة **** يمشي طويل الراس من غير حقران
ان جا نهارٍ ساعةٍ به طويلة **** ملكادهم يشبع به الذيب سرحان
الخيل بالفرسان يرهق صهيلة **** غاب اليقين وحاضرٍ كل شيطان
ربعي مروين السيوف الصقيلة **** جعافرة عند القبايل لهم شان
ياما ارملوا بأفعالهم من حليلة **** وساعدهم الأيمن خلايف عليان
اللي جهل يسمع عقابٍ وجيله **** ينبيك عنهم حاضر الفكر فهمان
هرجٍ صحيحٍ واضحٍ لك دليله **** محمد الأحمد بعثهم بديوان
ذاك السديري ماعلومه هزيلة **** حراً تربى بالمعالي ورفعان
ماولف الاضو ذكر حكيله **** قولٍ على قولٍ تقول العرب كان
لولا أجواد الناس ماله عقيلة **** تاريخ عوق الخيل شيباً وشبان
خيالنا لو تسئلون الكحيلة **** تشهد لنا صم البرك والخفى بان
من لابة تزبن دخيلات يجيله **** دخيلهم عن واهج الشمس ينصان
أولاد وايل كاسبين النفيلة **** والهرج مايثبت على غير برهان
هل الفعول الطيبة والجزيلة **** وايل لهم بالمجد منزل ومسكان
عدوهم يسقونه الحنضليلة **** يجرع من العلقم قراطيع ويهان
يوم البرى رده عميل لعميله **** الجمع يزبر والوغى بينهم حان
نشت بها سحب المنايا المخيلة **** بمصقلات الهند ومزرج الزان
الموت يزجر واحمر الدم سيله **** وربانها قب تصاهل بفرسان
تلاحمت بين الخصيمين خيله **** الخيل تنهم والعريني بالايمان
معاركٍ دارت رحاها مهيلة **** تصرخ بها خضر النمش واللغا شان
خيالنا تاطى الحوافر قتيله **** اليا سمك عج الرمك خلف الاضعان
اليا عثا بالخيل فعله فصيله **** سيفه لهامات المناعير ديّان
ملكا دنا يشف الطنا والغليلة **** تشهد لنا جرد السبايا بالأكوان
وذي قار شاهدنا وغيره مثيله **** أرامل المنذر حماها ابن شيبان
المنذرية يوم جتنا دخيله **** حنّا زبنها يوم لوذات الأذهان
جتنا تسوقها البلاوي ذليلة **** وعدنا لها مجد الشرف بعد الاحزان
حنا كسرنا جيش كسرى وفيله **** وعمّا نوى حنّا جزيناه حرمان
حنا هل الجمع الذي ينقنيله **** نكسر جحافل غازياً شن عدوان
ماننهزم عن حقنا مستحيله **** وحنا نفرق بين خلٍ وخلان
حريبنا يجرع قراطيع ويله **** يشكي غلايل فعلنا راح ندمان
بالمعركة نجزاه بأشنع سحيله **** نكسب مفاخير المعارك بميدان
عبرت عن عصرٍ ورثنا نزيله **** يوم الفرس والسيف وعنان وسنان
والناس كل صاع حقه مكيله **** ماهي مذمة للقبايل وبهتان
كلاً على حمله صبوراً يشيله **** اثبت على ماقلت والفعل سلطان
أفعالنا عند المؤرخ نبيلة **** كلام ابن كلثوم يثبت بوكدان
اليا نوانا جاهلاً نعتنيله **** وبجهلنا نجهل على كل جهلان
اليا انهضم راع الضلوع الهزيلة **** تلقى فعايلنا جزيلات وسمان
أجموعنا بالحرب ماينقويله **** دسنا رواسيها وسدنا بالأوطان
سدنا الجزيرة ونعدل ميل شيله **** وحنا جعلنا كل قاسينها ليان
من شرقي البحرين لحدود نيله **** نامر وننها مانداري بها إنسان
لنا زكاة المال واخضر نخيله **** وحنا اليا زرنا عسيرٍ لنا هان
وايل سلاطين العرب تنتميله **** ومنا كليب اللي قطع راس حسان
ومنا بطل ذي قار مزبن دخيله **** وحتى عمر والزير بالأصل ويلان
ومنا المثنى قاد جندٍ بسيله **** جيشٍ عرمرم يوم تحطيم الأوثان
يوم سهومه مثل وبل الرفيلة **** والسيف من سفك الحمر ذاك رويان
ومنا الملوك اللي خطاهم ثقيلة **** أسياد تعرف من قديم الأزمان
ستر العذارى ناقضات الجديلة **** ماعقبه مقرن على الحق عيان
الله حماهم عن طريق الرذيلة **** اللي قد أهم هادي الرشد رحمان
أفعالهم شر الضغاين تزيله **** تقضي على حاسد وظالم وفتان
المقرني من عزوة نعتزيله **** عن الجزيرة زاح ظلماً وطغيان
عبد العزيز اللي قمع كل عيله **** راع المعالي واعتلى المجد بمكان
حتى بحد السيف جوه صفيله **** وسبع الخلا من الخوف مايقرب الضان
هو الذي شكر الثنا يستويله **** تنشر له البيضا على راس مابان
والجنة الخضراء يظله ظليله **** يفوز عند الله بعفوٍ وغفران
دولة هل العوجاء عريبة وأصيلة **** بوايل ووايل من نضانيض عدنان
أهل الحجا وأهل الذرى والفضيلة **** وعوجا على من ينكر الحق عوجان
شبوا على كبد المعادي شعيله **** اسقوه كاس المر جرعات الأهوان
كم حاكماً عنهم تجلى رحيله **** عدم وجوده ماتقل بالوطا كان
ينبيك تاريخ العصور السميلة **** ويشهد لك الحاضر تشوفه بالأعيان
المملكة مثل الهنوف الجميلة **** لبست ثياب العز من كل الأركان
فيص بذل كل الجهود بسبيله **** للملتجي صارت ملاذاً ومزبان
وجعل بها الطرق العسيرة سهيلة **** حتى نهضها واستمدت بعمران
ومنا الصباح اللي بهم عدل ميله **** بطرافهم يعيش عايب وعجزان
نفوسهم بالمال ماهي بخيلة **** صباح والأسرة مجاذيب عقبان
ومنا الخليفة عز من يلتجيله **** هل الصخا والجود عطبين الأطعان
شيوخ لهم بالضد حيل وحيله **** حكام بالبحرين لهم الهواء زان
ومنا مصوت بالعشا كل ليلة **** يزهم بعالي الصوت لمن كان جيعان
اللي يصوت بالسنين الوخيلة **** بيته ينادي بالكرم كل الأحيان
ومنا الدريعي يوم يسحب صقيلة **** سيفه يشيل الراس من فوق الأمتان
لعيون حصه مايمصه نجيله **** ماعاد يتلى الخيل مهرة ولاحصان
ومنا عقاب الخيل مرذا الأصيلة **** ومسكت الورع العجي وابن هزان
هزازنة والمدح فيهم نحيله **** ان جاء نهارٍ فيه رجف ورنان
وجديع ابن هذال مابه جهيله **** وساجر مسوي للنضا سبت حفيان
وبرجس غدير الموت حامي الدبيلة **** وابا الشيوخ اليا توشح بشامان
وكنعان يعجب خفرة ينتخي له **** وابن سمير اللي وراء ضلع حوران
ومنا اخو جحلة فارساً ينوحيله **** تعرف ملاكيده ليا طار الأيقان
والسيل يجري من مجاري مسيله **** وقولاً بلا فعلٍ طعن فيه مشعان
وهرج بلا صدقٍ قليل حصيله **** ماقل دل وذاكره قبل راكان
والهرج يكفي عن كثيره قليله **** ماقلت زود في كلامي ونقصان
اجدع هزيل القاف وآخذ بديله **** واعوض الهزلان دسم ومليان
هذا كلام اللي وزن قرح قيله **** والعيب هرجٍ مايوزن بميزان
من شاعرٍ بدع المثل يرتهيله **** مثايلاً قاله لسان الجويعان
تمت بذكر الله منجي خليله **** اللي أنزل الحكمة على يدين لقمان
وصلاة ربي للنبي وتهليله **** اللي فتح له جنة الخلد رضوان