|
رد: ديوان الشاعر ناصر بن محمد القحطاني شاعر الأندلس راسي ولو شح الزمن ماحنيته - ناصر القحطاني :::]] راسي[[:::: راسي ولو شح الزمن ماحنيته ماباقي الا انتى توطين راسي رضيت بالهم وتعزبت بيته وصبري وعزة نفسي اهلى وناسي يا مرحبا بالجرح لو ماقويته الذل فى وجه عنيد وقاسي ان طاعنى الخفاق ولا عصيته ماخنت فى يوم من الايام باسي لعل قلبا مايثور لو نخيته تصبح ركونه للمواجع كراسي وان مرنى ليل الغرام وسريته لاتحسبين انى مع الوقت ناسي جرحا برا وان مابرا مانسيته لو يمتلى من مويه العذر كاسي تدرين راسي للبشر ماحنيته لاانتى ولا غيرك بيوطون راسي |
رد: ديوان الشاعر ناصر بن محمد القحطاني شاعر الأندلس يادارنا دام ابو متعب على الكرسي - ناصر القحطاني ((( يادارنا ))) يادارنا دام ابومتعب على الكرسي يقرا على اهلك واراضيك آية الكرسي لين السفينة على امواج البحر ترسي تشتد الايام .. والديره سعودية مافيه فارس بلا سيف وبلا هيبه ومافيه والد بلا قلب وبلا طيبه ومابه شرف مثل خدمة مكه وطيبه تشتد الايام .. والديره سعودي ياحلو قوله من اللي ماسمع قوله لاحدا يساوم على الدين وعلى الدوله وياحلو شوفة جموع الشعب من حوله تشتد الايام .. والديره سعودية ارواحنا رهن اشارة كفه الطايل وقلوبنا له سواة اعقاله المايل وأحلامنا تنتظر مجهوده الهايل تشتد الايام ,, والديره سعودية شعبه .. ونبغاه ونحبه ونحتاجه ونجيه ونصارحه ونمون ونواجه هذي معاريضنا فيها مية حاجه تشتد الايام ,, والديره سعودية ماتستقيم الديار ,, الا باهاليها وبلادنا .. تتبع ولاة أمرنا فيها بالروح والدم نفديهم ونفديها تشتد الايام ,, والديره سعودية |
رد: ديوان الشاعر ناصر بن محمد القحطاني شاعر الأندلس يسعد صباح الفقر ياللي تذمينه - ناصر القحطاني يسعد صباح الفقر ياللي تذمينه في ذمتي ما انتي من الفقر معذوره ماشلت هم الرغيف اللي تشيلينه كل الهموم لسواد العين مذخوره مانتي فقيره تقولين اليسر وينه ياقطعة السكر من الملح ميسوره من علم الجوري أنشودة بساتينه من هز ريش النعاس اللي كسا حوره من ذكر الخيزران اللي نسى لينه من جدل الليل لين اختال ديجوره سلسالك الفضي اصلا لو تزمينه ماراحت أكثر عقود الماس مغروره والأزرق الرث ياملحه ويازينه أبها من أرض نهار العيد ممطوره مستورة الحال بس القاف تغرينه ليه اتنحى واخلي الحال مستوره والله لأغني لفقر غنت سنينه لين أيسر المترفات تموت مقهوره قالوا لي إن الجديل اللي تربينه معه تربيت حلم فاحت عطوره قالوا بذاك الركن سر تخبينه ومراية من رداة الحظ مكسوره لاينكسر مثلها الخاطر وتشقينه تمنظري في المرايه حي هالصوره مذكور جرح ورى الأضلاع تخفينه وتحت المخده رسالة عشق مذكوره أثر الهوى جاي يسوق الشوق بإيدينه غصن جفاه اليباس وزف عصفوره يامن يكون الحبيب اللي تحبينه ياللي بوجه الليالي ثروره وثوره وقت مضى ملمس اللعبه تمنينه واليوم خضر القلوب ألعاب منثوره الحزن .. ليه العيون السود في عينه والبحه اللي ترد الروح مذعوره فقر ستير ولا ازكى من رياحينه ولا نعيم فضوح تغرق زهوره والميت اللي يبي دعوات حيينه كنتي وصاته ونزفه وآخر شعوره يازمة الغيم ورخاية هدب عينه ماقلت لك ماانتي من الفقر معذوره |
رد: ديوان الشاعر ناصر بن محمد القحطاني شاعر الأندلس يقصار الثياب - ناصر القحطاني اهل الأذكار تدعي والظلام انتحى والدعاوي تهز مشيدات القصور والخطاوي تعثر بين خوف وسحا والفتن تشتعل وانتم سواة البدور يا قصار الثياب ويا طوال اللحى لا تفيض العيون ولا تضيق الصدور دارت الأرض بالعالم ودار الرحا وانتم الشامخين وما تبقى يدور كل ما المح شموس وجيهكم في الضحى احمد اللي بعيني زود النور نور في الجباه السمار اللي ظهر ما انمحى ابشروا به وهو يشفع بيوم النشور السنتكم عطاها الله حديث فصحا وافئدتكم من الإيمان تنضح سرور قصر المسك يا حمالته واستحى يوم جاء يعطي اعطيتموه طيب وطهور يا تلاميذ عقد الصفوه اللي نحى يا حبايب صلاة الفجر واهل السحور يا رجال على يديكم صحى من صحى سعد روح تغذت من بصيرة غيور انتم لمعشر السالين خير نصحا وانتم لنصرة الدين اصدق اللي يثور ان دخل صفكم وجه كذب والتحى رده اللي يرد الكيد وسط النحور وان هرج زيد لعبيد بسوالف جحا لا لحقكم شكوك ولا لحقنا نفور واللي انزل تبارك والقلم والضحى انكم هدينا عن محدثات الأمور واصلوا يا بركتنا دون خوف وسحا ردوا نفوسنا اللوامه من القصور |
رد: ديوان الشاعر ناصر بن محمد القحطاني شاعر الأندلس يمه الغربة وفرقاك ملتمه - ناصر القحطاني يمه الغربة وفرقاك ملتمه دمعة العين هذي مالها داعي يابعد راسي انتي ليه مهتمه الوجع لي سواة الناي للراعي آخر أخباري الذمه هي الذمه والوصايا هذيك تقدي شراعي مابه الا السواد يحاود اليمه ولا به الا البياض اللي ورا أضلاعي وأشعل ما يفارق ليل حضن امه وأخضر كل صبح من أول أتباعي يتعب البرق ما أتعب النظر يمه وانشديهن بعد ما قلت أطماعي أنجبن لي عروسة حلم أضمه أو بعد توها تشرب عطش قاعي واذكري كيف كان العود ابو عمه ايتعلى صهيله وأرخي أسماعي امنياتي بدرب ودي أتمه آخره صعب وأصعب منه مرجاعي يوم كلن فزع له خاله وعمه يكفي اني وردت العد بذراعي أرفع الراس بين الروس ما همه وأتباهى وأنا الغرقان بأوجاعي يمه الحر طبعه يعشق القمة وأنتي اللي فطمتيني على أطباعي الهواء دام راسي حي ويشمه والله اني لاسوق هناك ذعذاعي غربة تلوي ذراع أشجع الخمه لا تخافينها لو تقلب أوضاعي يمكن تبعثر الرجال وتلمه بس بدري عليها تلوي ذراعي |
رد: ديوان الشاعر ناصر بن محمد القحطاني شاعر الأندلس المقابر - ناصر القحطاني في مكان تفاخر فيه روس النصايب و امتلت من عظام الناس فاضي قبوره كل شي يتراجف فيه حتى الهبايب والذهايب توارى والنصايب فخوره وقفت بي قدم رجلي وكلي عجايب والبكا حولي اسمع له تمرد و ثوره لين جاء واخجل عيون تودع حبايب مؤمن جفف الدمع بحديث و سوره عن يميني بيوت السابقين والذهايب وعن يساري بيوت اللاحقين محفوره اسمع اصغر ذنوبي كنه يصيح تايب والقدم ما نشدت بموقفه عن شعوره واذكر انه تشره لحظه وكان هايب قلت خل الطواري ما طلبتك مشوره دامها جت من الله مرحبا بالمصايب لو ثقل حمل نفس المسلم اللي صبوره جيت اشيل الجروح المشرقات العطايب طيب الله ثرى اللي فارق العين نوره ما ركزت النصيبه واعتلت راس شايب كود ابادّل ذاك القبر لا جيت ازوره عل ما تبخل بماها عليه السحايب كودها تستر اطراف النصيبه زهوره كل حزن ملا الدنيا على القلب ذايب وانقلي يالجروح الحمل لو زاد جوره كنت اعزي مجاريح بعاد وقرايب واترك الخاطر لعيني تجبر كسوره تغرف الحزن وتصب العباير صبايب وان خلص دمعها لعيون ابوي معذوره شايل صورته في البال لو كان غايب ليته اللي يشيل لشخصي اليوم صوره كان لي ظن في صغري ولا هو بصايب احسب ان القبور من الحياة مهجوره عل قبره نعيم وصالحاته سبايب هي عزاي بوادع مودّع جاه دوره |
رد: ديوان الشاعر ناصر بن محمد القحطاني شاعر الأندلس يمه اذنبت ونزحت من العشيره - ناصر القحطاني يمه اذنبت ونزحت من العشيره وان تمنو توبتي مانيب تايب مابي لدنيا الغنادير اي سيره طايح من عام الاول في مصايب يمه اللي حب له طفله صغيره ويش يسوي لاغدا فيها طلايب طفلة ماكانت بحبي جديره بس كانت غير عن كل الحبايب كنت اسميها العنود المستذيره ليت اهلها العام سموها عجايب كنت اجيها مثل الامطار الغزيره كنت اضيع بجوها مثل الهبايب وادعي الله هي متى تصبح كبيره تفهم اشلون المكان يصير ذايب ان تغنت تصبح الطرقه قصيره وان تغلت تصبح جروحي عطايب صنتها مثل البحر لابعد جزيره ماتركت علومها لاهل الركايب ديرة ماهي بها ماهيب ديره لو ثراها عشب واعلاها سحايب يمه اتحبين طايلة الضفيره اااه والله ياعليها اشقر ذوايب قالت ان جا الراس شايب فيه خيره قلت يابنت الحلال الراس شايب قالت الا الحب وشهو وش مصيره قلت انا استاهل وانا كل السبايب ماجزا اللي حب له طفله صغيره غير قبر و ضحكها فوقه نصايب |
رد: ديوان الشاعر ناصر بن محمد القحطاني شاعر الأندلس بغداد - ناصر القحطاني عساها فاتحة برد وسلام وخاتمة و قاد على دار السلام الله يروع من بروعها حضارة سومر وبابل قبل تشريفة الميلاد عروق الرسل والعلم واهل الشعر وروايعها هوى سيف الله المسلول يوم السيوف حداد مساري سربة كان المثنى في طلايعها عروس زفها المنصور والدنيا لها سجاد ودلعها الرشيد الله عليها يوم دلعها بدت بالسندس اللي يهوس الخلان والحساد وكثر ماهزها التاريخ ما اهتزت مرابعها بقت خضر مرابعها بقت تنجب لنا أمجاد بقت بيض صنايعها بقت سود وقايعها ورى ما تستميت اقلوبنا معها وهي بغداد ياكبر العار لو ما تستميت قلوبنا معها عليها الله وامان الله الى ذرات زين ابلاد هجد صوت القنابل جنب تهليلة جوامعها دهاها من ورى الحملات ليل لو نقص يزداد أهلنا في مدامعها واهلها في مطامعها هل الحرية اللي لا غشى اصحاب البيوت ارقاد تفرق بينها من دوية الهاون مضاجعها هل الحرية اللي بعدها صاروا بنات الضاد ينوش المعتدي حشمة ملابسهن ويرفعها هل الحرية اللي قصت أجنحة أكثر الأولاد مادام ايدينها ماترفع اثنين من أصابعها تعودنا على حرق النسل والحرث والأصفاد تعودنا على نار يطفيها مولعها يبس بكفوفها إلا غصن زيتون وكما المعتاد عناقيد الهدايا جاتنا من كف صانعها عسى المقبل مثل صيحة ثمود ومثل صرصر عاد عشان أهل البيوت الخاربه تبرى مواجعها ألا وين المراكب سايره في حضرة الرواد عساهم للدواير لين تدرجهم منافعها مصير امصار و اجيال وزمن وجموع بيد افراد لها التاريخ بالمرصاد وان خانت ودايعها محبتنا عداوه والقلوب قريبات بعاد بعد ما نصنع الكذبه نصدقها ونتبعها خذتنا العنتريات الله يبيح من ابن شداد وضعنا بالخطب ليت الخطب نقدر نضيعها تواعدنا مع الوحدة وصرنا نخلف الميعاد مذاهب وانظمه واحزاب من يقدر يجمعها تصهين دم ناس طايرين بعجة الأوغاد تصاغرنا مثل ماستصغر الكرسي مراجعها أخيرا : كم بقى طاغي وكم باغي وكم جلاد وكم لص وكم أصنام وكم أوهام نصارعها وكم صورة تظن الروح والدم أغنيه وانشاد وهي كل هناك يدوسها والا يقطعها لعل الليله اللي جابت الكابوس ماتنعاد وبسم الله على بغداد من شي يروعها |
| الساعة الآن 01:02 PM. |
Powered by vBulletin® Version 3.8.8
Copyright ©2000 - 2025, vBulletin Solutions, Inc.
ظ„ظٹظ†ظƒط§طھ -
ط¯ط¹ظ… : SEO by vBSEO 3.5.1 Trans by
Coordination Forum √ 1.0 By:
мộнαηηαď © 2011