اشتعل فكري (( اهداء لكل شامخ))

المشاركة الأصلية كتبت بواسطة ابو عبدالاله

اشتعل فكري

اشتعل فكري وعديت من فوق الغيوم
والمشاعر مثل غصن يداعبه الهوى

طار من حضن الفرايد فريده ماتروم
وارتكى ذيب العبيدي ولايمها سوى

ياجنون الشعر في خافقي شي يحوم
ركديها بالثنادي وجيبي لي الشوى

من شفا حائل سرينا ولافي العين نوم
والطريق اللي سريناه مابه ملتوى

والهدف سامي وانا دوم شبحي للنجوم
والمراجل ماكسبها ضعيف المستوى

يانديبي قوم والعلم بالظرف مختوم
زاكي بالطيب والعود لزرق وانطوى

سوقها صوب الفهر محزمي وقت اللزوم
وعند ابو معتز وقف وعطه المحتوى

سلمه بعد التحيه على وضح السلوم
مايجول بخافقي من علوم وماحوى

ياوسيعين المعرفه منفذة الكموم
لاح براقً وصاب الضماير بالجوى

لفحت البراق لاحت وخالفها سموم
واه .. ياقلبً من المزن حده مارتوى

قالوا ان الغيم بالقلب يترك له رسوم
قلت انا في ذمتى ماكذب منهو روى

الصحيح ان المشاعر توسم بالوسوم
والصحيح ان العبيدي من البرق انكوى

وطار من وكر الفرايد فريده ماتروم
واخلفت جملة حرار بعضها ماضوى

والسلام اختام والطيب من جملة قسوم
كرمك ربي بها يارفيع المستوى


ذيب العبيدي