يا مشعلٍ نار الفتن بالرسايل = وفي كل يمة تجتهد بالمراسيل
تبث بالجوال غث وهزايل = وتضفي على المنشور زيفٍ وتضليل
ترمي التهم مابين عدلٍ ومايل = من شأن توجد مكسبٍ بالمقابيل
مالك مقدي يقعدك وأنت عايل = يا مخطيٍ درب السنع والتنافيل
لا تحسبٍ في شين فعلك نفايل = وإلا تكدّر بإبرتك صافي النيل
دافع صنيعك من لهيب الغلايل = ولا يحرك الخفرات قبل الرجاجيل
تزرع غضب وش ترتجي من حصايل = يا مروّجٍ بالزور بعض الأقاويل
سود الصنايع تتخذها وسايل =وتزيد فيض الزعزعة والتهاويل
تشعل بخبث وسوّ نية فتايل = وتجر للتجريح صوت ومواويل
تعزف وتر بألحان بث الهوايل = والزيف والتهويل والجور والميل
بانت فعالك ما بقالك محايل = وتكشفت بوضوح مثل القناديل
حقايقٍ بآيات نور ودلايل = ما تنجحد يا منّكر الجدي وسهيل
بيّن خفا مغزاك صدقٍ صمايل =وأخطاك ما تخفاك هيلٍ بلا كيل
خالفت في مبداك سلم الأوايل = وعرّضت نفسك للخطأ والبهاذيل
في لابتك ما دك عرق الفشايل = يا مشوّهٍ تاريخ رؤوس المشاكيل
شوهت في شين النبأ والفعايل = نهج الحمايل ياقليل المحاصيل
لقيت لك في كل موقع فوايل = ومعرفاتٍ للثناء والطهابيل
سجل شخصك حافلٍ بالدغايل = وتجيد فن البهرجة والأباطيل
في مسرح الهزلات صايل وجايل = حيثٍ مالك بالمعالي مداخيل
تنسج خطط وأحداث دق وجلايل = يا عاشقٍ في منهجك ظلمة الليل