الحلقة الأولى


بحكمي من المقربات لعائلتها عرفتها منذ الصغر .. طفلة جميلة مشاغبة …
ترعرعت وشبت بسرعة رهيبة …لتصبح جميلة العائلة ..
وهي إحدى سبع بنات لأب يعشق الأولاد لكنه لم يرزق إلا البنات
ومع الاسف كان من غير محددي الجنسية )بدون (بالطبع مما زاد الطين بله!!

كانت جميلة لدرجة يتكلم عنها كل من يحيط بها ..حتى خالاتها وبناتهن كن يشعرن
بالغيرة منها …تماما كما كانت سندريلا وأخواتها ..

كانت تكن لي معزة خاصة بحكم حبي للاستماع إلي الجميع ولا أضع للسن حاجزا بيني
وبين أحد ..فكنت استمع لمغامراتها المدرسية بين الحين والأخر
والى خفايا احساساتها ومشاعرها ..

كانت والدتها منشغلة جدا في تربية أخواتها الصغيرات …
وكون ترتيبها الثانية كانت تعاني كثيرا من عدم اهتمام أختها الكبيرة بها ..
وكانت أفكارهن بعيدة كل البعد عن بعضهم ..مما يؤدي في كثير من الأحيان
إلى مشاحنات لا حصر لها وشجار ينتهي بالضرب لكلتيهما …

في معظم الأحيان كنت أحاول أن أكون صديقة الطرفين ..
وانصح أشير بما يجب فعله حين كانتا تلجأن إلى ..
وتنتهي المشاحنات لآن وتعود مره أخري ..



على هذا المنوال استمرت حياة " شوق " وأخواتها ..
الى ان تزوجت الأخت الكبرى .. وقامت شوق بعد ذلك بدور الأخت الكبرى في المنزل.

من جمالها .. كانت الأنظار عليها عند خروجنا معا من المنزل او عندما
كنت اصحبها للسوق لشراء بعض الحاجيات ..لدرجة كنت اشعر معها بالخوف عليها
من معاكسات الشباب التي لم تكن تنتهي ..


جاءتني في أحد المرات وقالت :

شوق : أبى أقولك شغله وآخذ رايج فيها ..بس أخاف تعصبين علي ؟

العنود : أنتي تعرفيني زين ..لو الشي غلط ما راح اجاملج ..
بس قولي وتأكدي انه كل شي بتقولينه بيكون محفوظ اهني ..وأشرت على قلبي

فحضنتني بقوة وهي تقول : والله أحس انج أمي .. أمي الله يحفظها حبها موجود بقلبي
بس انتي.. انتي غير حسستيني من يوم ما كنت صغيره انج تخافين علي وتهتمينلي
مع انج مو ملزومة فيني ..أنا وايد احبج واعزج وغلاتج عندي بالدنيا


طبعا فرحت لهالإطراء والمدح بس حسيت انه ما خفي كان اعظم وراء
هالكلمات المعسولة ..وبنظرة قوية

قلتلها : شوقو ..يوزي..وقوليلي ايشصاير؟؟؟


شوق : بقولج والله يالعنود بس ابي توعديني ما تزعلين مني مهما كان الأمر
وابيج تقولينلي شسوي … الله يخليج .. أنا خايفه والله !!


العنود : طيحتي قلبي باركبي يا شوق ..قولي يا عمري ..قولي ..

بسرعه رديت وقلت : شوق تكفين ترى والله خرعتيني .. شفيج ؟




يتبع

رهف

ها انت تعودين الينا كما عودتنا سابقا بقصصك الرائعه والمشوقه
سجلي اعجابي بها ومن متابعينك يالغاليه فديتك ومبروك عليك الالفيه الثالثه

قصه رائعه ومؤثره متابع بقوه

يعطيك العافيه

تحياتى

يسلمون لي المتابعين والمنتظرين


لعيونكم راح تنزل الحلقة الثانية


شوق : العنود .. لا تخافين بس سمعيني تكفين ..
من مدة وفي المدرسة وحده من صديقاتي تحن علي ؟

العنود : تحن شنو تبي ؟

شوق : لا تستعجلين يايتج بالكلام ..

العنود : يا بردج يا شوق بسرعه قولي ...

شوق : اممم تبيني .. تبيني اكلم اخوها ...

العنود : شنو ؟؟؟ من صجج ؟؟

شوق : أي والله يالعنود .. ولانها رفيجتي وبالصف معاي ..

كل ما اتهرب منها ترد تفتح الموضوع مره ثانية ..


العنود بعد تفكير : انتي ليش متضايقه ؟؟؟

شوق : يعني شنو ليش متضايقه ؟؟ عادي يعني ؟؟ اكلمه ؟؟

العنود : لا طبعا انا ما قلت عادي اتكلمينه .. انا اقول انتي
ما تبين اتسوين هالشي .. رافضة وما وافقتي ..
شنو مضايقج ..زعل رفيجتج يعني ؟؟

شوق : لا مو مسالة زعلها … بس

العنود : بس شنو ؟؟

شوق : الاسبوع اللي فات شفته في نهاية الدوام …
وحسيت بشي مو طبيعي بنظراته .. حسيت ..
كنه يقولي " تكفين " ارحميني ..تصدقين عاد والله كسر خاطري …



العنود : وانا شنو افهم من انه كسر خاطرج ؟

شوق : لا يالعنود .. والله ما اقصد شي .. بس تدرين ..
من كثر ما اشوف نظرات الشباب لي بره …
بديت اميز نوع النظره ..هذا كان مختلف ..

العنود : اممم مختلف ها .. شوقو هاتي من الاخر ..
شنو تبين اتسوين ..شكلك ما يوحي بالرفض ..!!!!

شوق : تبين الصراحه يالعنود .. محتارة وخايفه ..
وانا قلتلج لانج غير ..غير عن أي وحده ممكن افتحلها قلبي ..
انتي بتفهمين كل كلمة اقولها ومغزى كلامي ..
وعشان جذي بقولج الحقيقة ومن غير لف ولا دوران


العنود وبعيون مفتوحه قالت لها : شنو بعد ؟؟؟

شوق : انا كلمته يالعنود …


حطت العنود ايدها على راسها ونزلته وقالت: لا حول ولا قوة الا بالله ؟؟
شلون اتسوين جذي يا شوق شلوووون ؟؟

شوق : ارجوج العنود سمعيني … ابيج اتعرفين كل شي
بس لا تتضايقين .. سمعيني بس سمعيني والله ما ابي
اخش عليج شي بقولج من الاول للاخر ..

العنود والدموع بعينها : قولي .. وتاكدي انه سرج في بير ..
اهم شي لا تخلين شي في قلبج ..

شوق وهي تبتسم ومرتاحة : حاضر يالغالية..سمعي ..
كانت شوق تستجمع قواها لتقول ما لديها ...
وبدأت تحكي ... والعنود كلها آذان صاغية ..


شوق : من كثر الالحاح من صديقتي بعد ما شفته عند المدرسة
وحسيت بنظراته البريئة .. العنود ما قدرت أقاوم .. وقلت حق صديقتي
اني موافقه .. بس بشرط ..

العنود)) بنظرة فاحصة )) شرط شنو ؟

شوق : ان لاتتمادى المكالمات ويكون فيها حدود ..

العنود : خوووش كلام وبعدين ؟؟

شوق : ردت علي وقالت انه موافق .. وطلبت منها اني انا اختار الوقت اللي
أكلمه فيه ولا يدق اهوه نهائيا ...وهم ردت وقالت انه موافق ..


العنود : انزززززززززين .. وشنو صار عقب ؟؟


شوق : بقولج والله .. سمعي ... دقيت عليه ..
وكان يومها اهلي كلهم رايحين عرس
وانا واختي الصغيرة في البيت .. وكان تعارفنا ... بسيط وسريع ..

العنود : اممممممممممم... سريع ها ..؟؟؟ شنو قلتو ؟؟؟

شوق : والله يالعنود انا ما كنت مرتبة شي بس اهوه ما شاء الله عليه
افكاره كانت مرتبة وكان يتكلم وكأنه يخطط لشي مستقبلي ..


العنود : مستقبلي .. مثل شنو يعني ؟



يتبع

الحلقة 3


شوق : يعني كان اكثر كلامه يدل على انه ناوي يسافر ويكمل دراسته
بس قبل ما يسافر ويتغرب يبي يتزوج علشان يحافظ على نفسه ..

العنود : حلو ...

شوق : شنو اللي حلو ؟؟؟

العنود : حلو انه يكون تفكيره منصب على هالشي ومخه نظيف جذي
مو مثل باجي الشباب اللي مخهم كله بال..... ما علينا ..

شوق : اي والله يالعنود .. بس انا خايفه من شي واحد !!!

العنود : شنو ..؟؟؟

شوق : انا (( بدون )) وهو كويتي .. يعني تتوقعين ما راح يكون هالشي
عائق في علاقتنا .. وممكن انه يوصلها لطريق مسدود..؟؟؟

العنود : شوفي شوق بقولج شغله حطيها بأذونج وفكري فيها عدل ...
اول شي لازم تعرفين انتي شنو تبين من هالعلاقة ؟ شنو هدفج ؟؟
ثاني شي لازم تحطين في بالج كل الامور اللي ممكن ترفعج فوق والشغلات
اللي ممكن تنزلج سابع ارض ؟؟؟

شوق : امبييييه .. شنو قصدج يالعنود ؟؟ ليش انزل سابع ارض ؟؟

العنود : انا اقولج يا عمري .. الحب ما يعرف المنطق ومثل ما قالو انه عمي
واللي يقوده مجنون .. بس لا تنسين انج الطرف الضعيف .. وممكن اي شي
يصير عكس اللي تبينه يحطمج ..فخليج واعية من البداية .. لا تنهدين كلج
وبعدين ما تنفع الحسافة .


شوق : والله خوفتيني يالعنود ..
انا كنت افكر وايد بس انتي جذي خليتيني اخاف وانا ما ابي اتعب ..

العنود : ليش ما تشاركينه هالكلام قبل ما تصير علاقتكم شي لا يمكن التخلي عنه
وتصير عقب مصدر للالم اللامنتهي ... انا مو قاعده اشجعج يا شوق .. وتاكدي بانج تهميني
واني ما ودي تتعبين وتشيلين هم وانتي صغيره ..
وتاكدي من هدفه من علاقته وياج .. وشنو ناوي وكل شي كل شي ..
علشان لا تندمين في النهاية ..

شوق : انا يتني فكره العنود .... بس تكفين قولي اي ..

العنود : اقول اي على شنو ؟؟ لازم اعرف اول ...

شوق : شقلتي يالعنود ؟؟؟

العنود : بشنو ؟؟؟ مو لازم ادري شنو تبين ؟؟؟

شوق : انا .. ابيج … انه … انتي …

العنود : ( وهي تضحك ) وراس امي بصكج كف على عينج ..خلصي

شوق : ايشرايج …انتي اتكلمينه ؟؟

العنود : شنو ؟؟ لا طبعا !!!
استخبلتي انتي

شوق : تكفين العنود لحظة لحظة بس سمعيني اول العنود !!!!!!!!!

العنود : لا يعني لا !!!

شوق : انا لما كلمته قلتله انه محد يدري بس لما انتي اتكلمينه راح
يعرف انه السالفه مو لعب ..
ودام اني قلتلج معناها اكيد مو ناوية العب واهوه بعد راح يحسبلج
حساب وما يقدر يلف ويدور عليج مو صح ؟؟

العنود : صح بعينج..وان قال شي ما ينقال ؟؟؟

شوق : والله انه مؤدب وولد ناس تكفين العنود....(وهي تحضنها)

العنود : اوووف .. قومي قومي دقي عليه وخلينا انشوف اخرتها معاكم

رفعت شوق السماعه وبدات بطلب الرقم .. وبعد التحية طلبته من اخته
وما هي الا لحظات حتى جاء صوته يقول …. الو …

العنود : مرحبا ..

وليد : يا هلا .. هلا اختي من معاي ؟؟

العنود : انا من طرف شوق انا العنود ..

وليد : يا هلا وغلا خير ..شوق فيها شي ؟؟

العنود : لا الحمدلله ماكو الا الخير بس حبيت ادردش معاك شوي عنها ممكن ؟

وليد : اكيد اختي اتفضلي .. بس منو حضرتج ؟

العنود : انا بحسبة امها ..

وليد : والنعم فيج آمري ..

العنود : انا بجيك من الاخر يا خوي وما ابي اسئلك ..شلون ووين وليش..
بس بعرف شنو نهاية المطاف بهالعلاقة ؟؟

وليد : صدقيني يا اختي اني غرضي شريف ..
وانا مو من الناس اللي تلعب على بنات خلق الله ..
انا عندي خوات وربي يستر علىالجميع ..

العنود : خوووش مبدأ .. وربي يوفقك .. بس انت عارف انه شوق مو كويتية

وليد ( يتنهد ): أي ادري وهذا اللي كاسر ظهري بس ..

العنود : شلون ؟




يتبع

الحلقة الرابعه لعيونكم



وليد : انا هالموضوع مو مشكل لي أي اهمية بس المشكلة في الوالد والوالدة
اللي مصرين اني آخذ كويتية ..بس انا ما راح اسكت وراح احاول كثر ما اقدر
اني اتزوجها قبل ما اسافر للدراسة بره ..


العنود : وليد .. ليش ما تدارست امورك عدل قبل ما تشغل شوق ..
جذي انت معلقها بين نارين ..ليش خليت علاقتكم تتطور قبل ما تحدد انت شنو تبي ؟


وليد : والله ابيها وما اتصور اقدر اعيش من غيرها احبها والله احبها


العنود : لا حول ولا قوة الا بالله .. يعني اللحين اشلون ؟؟


وليد : ارجوج .. ارجوج ساعديني وعطيني فرصة اقدر اقنع اهلي ..


العنود : كل اللي ابيه منك انك ما تكلمها الى ان تلاقي حل ..
واحنا بنهايةالعام الدراسي فما ودي تشغلها ..ممكن ؟


وليد : حاضر يالعنود .. سلميلي عليها وما يصير خاطرج الا طيب .


العنود : الله يسلمك ومع السلامة .


وضعت العنود السماعه وهي في تفكير عميق وقالت : شوق ؟؟؟

شوق دامعة العينين : هلا


العنود : تبين الصراحة ؟؟


شوق : اكيد ..


العنود : الولد يبيج ومن قلب بس انا ما اعتقد اهله يرضون ..
الناس اللي تفكر بالاصل والفصل والفلوس والجنسية صعب تغيير رايهم ..
بس انا اقولج ديري بالج على روحج وخلي الامور بروحها تتعدل
وانتي خلي بالج بالدراسة لين يحلها الف حلال ..


دخلت نورا في هذه اللحظة تقول : كلوولوووش من قدج من قدج شوقو ..
علي ولد عمتي ياي مع اهله اليوم يخطبونج …!!!!!!!!!!

شوق ( مبهورة ) تنظر للعنود : شنو هالحظ ؟؟؟


نورا ( مو عارفة شالطبخة ) : اي يبه عليوي من زمان يبيج بس انتي ثقلانه


شوق : نورا واللي يسلمج ترى من صج مالي خلق


نورا : طاع هذي .. من صجج ؟؟؟ جان زين يخطبوني انا ..بس ماكو حظ..


شوق : تكفين نورا .. اكرميني بسكوتج


العنود : خلاص نورا يوزي عنها ...


نورا ( وهي طالعه): حاضر اهم شي امي تقول تزهبي وتكشخي
مو تطلعين بخلاجينج هذي


العنود : شوق يمكن يكون هذا دافع علشان وليد يتقدملج اسرع ؟؟


شوق : شلون ؟


العنود : اوكي خلي مراسم الخطبة تتم ...
بعد مو من اولها بيملجون اكيد بياخذون رايج ..
اتكونين حزتها وصلتي خبر حق اخت وليد بالسالفه ...
وشوفي اشلون يتصرف


شوق : انزين خلينا اندق وانقوله ...


العنود : لالالالالا مو عدله ... بيعتقد اننا قاعدين نخدعه علشان يتقدم ..
بس عن طريق اخته وانتي اتقولين لها تفاصيل اليوم بيكون اصدق ..
وانشوف شلون يتصرف


شوق : بس اخاف يالعنود لو اني اليوم قابلت علي وعمتي ابوي يحسبني موافقة
وانا ما ابي علي وابوي بخاطره يزوجني اياه لانه ابوه كويتي وولد عمتي ...

العنود( وهي تترك الغرفة ) : قولي حق امج وانا بعد بقولها انج ما تبين علي
وانج بتجاملينهم اليوم بس لين ينتهي الموضوع وانشوف ...


شوق : واذا وليد ما تصرف ؟؟؟!!!!


العنود ( بنظرة حادة ) : يعني ما يستاهلج وعلي اولى فيج ..


في صالة البيت


ام شوق : ها اخيرا عطتج افراج .. وين بتروحين قعدي ابيج ..


العنود : اي والله اطلقت سراحي اخيرا.. خير اشصاير ؟؟؟


ام شوق : ام علي عمتها اليوم بتخطبها ..


العنود : اي سمعت الضجة اللي سوتها نورا بالدار ...بس ..
اعتقد شوق ما تبيه


ام شوق : وي.. امبيه من قال ؟؟؟حلفي العنود ؟؟؟


العنود : شحلف عليه ..هذا اللي سمعته تقول انه حسبة اخوها ..


ام شوق : اي اخوها ..اي غربال ..كان ناوية تفضحنا مع ابوها كيفها
.. انا مالي شغل


العنود : اشلون مالج شغل مو انتي امها .. سمعيها .. وفهمي شنو تبي ..
وكل شي غصب الا الزواج ( وهي تهمس باذنها (والا ايشرايج ...؟؟؟؟
شفتي زواجج من ابوها وين وصلج...


ام شوق : تتنهد ... ايييييييييه ..الحمدلله ..يعني شسوي ..حسرتي ..
بيقلب الدنيا ابوها


العنود : قوليله توها اصغيره .. او كلمي عمتها احسن ..
على الاقل حبوبة ومو عصبية مثل ابوها ... يمكن تتفهم الموضوع ..


ام شوق : اي والله وانتي صاجة .. خليني اقوم ادق عليها ..


العنود : لالالا مو اللحين .. لما يجون بينج وبينها ..
وقوليلها اتكلم شوق احسن


ام شوق : شورج وهداية الله .


في المساء



العمة : هلا والله يا خوي اشلونكم ؟؟


الاب : بخير يا عساكم بخير ..هلا علي ..


علي : هلا خالي شلونك .. عمتي اشلونج ..


ام شوق : هلا فيكم والله يا حياالله من يانا .


العمة : وين الحبايب ..وين عروستنا ...


ام شوق : أ .. أأ.. ام علي تعالي ابيج اشوي .. خلينا اناديها ..



العمة : يلا ..


في الممر


ام شوق : ام علي .. تكفين الله يخليج كلميها ..


العمة : ليش اشفيها عسى ما شر ..!!!!!




>>>>>>>> يتبع

الحلقة الخامسه لعيونكم




ام شوق : ما ابي اقول جدام ابوها لا يسويها سالفه .. بس شوق ..
شوق تقول انه علي مثل اخوها وما تقدر تتزوجه ..

العمة (بحزن) :افا والله لييييش ؟؟

ام شوق : والله انا من الظهر ميتة من الخوف .. وما ادري شسوي ..

العمة : لا ما يحتاج اكلمها ..خليها براحتها وكل شي غصب الا الزواج ..
وانا ما ودي علي يتعب معاها لانها تكون مغصوبة عليه ..
والزواج قسمة ونصيب

عادت العمة الى الصالة فسالها الاب : ها وينها .. ما يت معاكم ..ليش ؟؟

العمة : لا اهية تعبانة اشوي ...

الاب : توها مثل الجني مع العنود .. اللحين تعبانة ..

علي : انزين يمه .. تكلمي ..

العمة ( وبنظرة نفي ): لا علي احنا تاخرنا خلينا نروح ونجي يوم ثاني
ابوك اللحين يبي عشا بالبيت ..

علي مستغرب : يماااااا..

الاب : شسالفه ؟؟؟ شنو صاير ؟؟اشفيكم ...شوقو شنو قالت ؟؟؟
وعندما لم يرد احد من الموجودين ....

صرخ بعصبية منادي : شووووووقوووو

شوق : هلا يبا هلا ... ( بخوف وهلع ) خير آآآآمر

الاب : وجعه ..تعالي اشوف .. شنو سالفتج ؟؟؟ اشفيها عمتج ؟؟

شوق : ماكو شي يا يبه ..ليش شنو فيها عمتي والله ما ادري ؟؟

الاب : والله ياخذج .. تحلفين بعد ..

رفع يده علشان يحكها كف .. هالوجه الجميل وقفت الام حاجز بينها وبينه ..

الام : يا ريال صل عالنبي كل شي بالهداوة .. البنت اكبرت ..

بو شوق : وخري ..محد امخربهم غيرج .. لا بارج الله فيج ولا فيهم ..

رجع الى شوق ومسك ايدها : شوفي .. يا عليوي يا ماكو غيره ..
ويا ويلج ان عرفت انج قايلة لا .. ويا سواد ليلج ان دريت ان عمتج ما تبيج..
يلا اللحين ذلفي غرفتج ويصير خير ..( ودفعها بقوة الى الامام )

رجعت شوق الى غرفتها تبكي وهي تسترجع شريط الاحداث..

الام : شفتي .. والله اني بتطلق من ورا فعايلكم انتي وخواتج ..

شوق: يمه حرام عليج انا اشسويت ؟؟؟ مو قصب الزواج ما احبه ما ابيه ..

الام : اششششششششششششش لا يسمعج والله يدفنج اهني ..

شوق : خل يسمع بس خلاص انا تعبت من هالعيشة كلها خوف ومحاتاة..

الام : قومي.. قومي دقي على عمتج وكلميها كلمتين سنعين عن ولدها
علشان ما تتضايق وتقول لابوج شي ما تشوفين الخير عقبه ابد ..
قومي اقنعيهابأي شي ..ترى والله ابوج اقشر وبيسود عيشتنا ..

شوق : خلاص انزين انا اعرف اشلون اخلي عمتي تنسى السالفه ..
اصلا انا بقولها عن وحده من رفيجاتي اتموت على علي ..
وخليها تخطبها اهيه .. وتنساني انا ..

تسارعت خطوات شوق الى التلفون بعد خروج والدها من البيت
وبدأت في الحديث عن صديقتها مع عمتها اللي بسرعه نست سالفة الخطبة وبدأت تسال
عن عنوان صديقة شوق..فطلبت منها شوق انها ما تبلغ ابوها عن اللي صار
وتقوله انه فهم غلط وكانت زيارة عادية ..

تنفست شوق الصعداء..
واسرعت بالخبر لامها اللي ارتاحت من شر هذا الموضوع ..

لحظات وكان جرس الباب يدق واذا هي العنود ..

شوق : وينج وينج والله كنت توني بدق عليج ؟؟

العنود : انا كنت قاعده على اعصابي ناطرتج ما دقيتي قلت ما يبيله تاخير
قومي يالعنود روحي يمكن تلحقين على اخر الحدث ..
يلا بالتفصيل الممل .. شنو صار ؟

بدأت شوق في سرد الموضوع من طقطق الى سلامو عليكم ..

العنود : امبييييه .. وابوج ....


شوق : بس..لما عمتي اتقوله ما كنت ناوية اخطب كنت زايرتكم بيحس بالفشلة
وما راح يجيب طاري الموضوع بعد نهائي..ها ..ايشرايج فيني ؟؟؟


العنود: والله انج منتي هينة ... وبنت الناس اللي وهقتيها في عليوي ؟؟


شوق : لا والله من صج اهيه من زمان تقولي انها معجبة فيه ولو يتقدم لها
يكون امل حياتها .. ويلا فكككه ..هالباب على هالخراب..

العنود : عليج امثال اتفشل . ..

شوق : اقوم ادق عليه ..؟؟؟

العنود : جب يلا عاد .. خليه يتحرمص يومين ..

شوق : العنووووووووووووود تكفين ..


العنود : لا يعني لا .. باجر يصير خير ..

مرت الايام وشوق تفتعل اسباب عدم الاتصال وكان تلفون المنزل يرن وما
ان يرفعه الاب حتى يتم اغلاق السماعه دون رد .. تكررت المكالمات دون رد

الى ان دخل الوالد في يوم وقال :

الاب : ايييه عبالهم يفلتون مني .. الرقم عندي اللحين وانا اوريهم ..

الام : رقم منو ؟ شصاير ؟

الاب :( بنظرة لجميع البنات وبالاخص شوق)
هالناس الفاضية اللي تدق وما ترد ..
بس هين ابي اعرفهم ووريهم ..

توقفت هنا شوق عن التنفس وهي تسمع الرقم ...

طلعت شوق بسرعه الى غرفتها بعد ما سمعت الرقم ..
وقفها ابوها وقال :

الاب : تدرين لو ادري انج ورا هالسوالف بقص راسج واعلقه جدام البيت

شوق : وانا شكو يبه .. ماكو غيري بهالبيت ..

الاب : هين يا شويقه هين ...ذلفي اللحين

دخلت شوق غرفتها وهي بحاجة الى تنفس الهواء لانه غاب عن رئتينها
مع كلمات ابوها .. يا حسرة على عمري ..بيروح هباء منثورا ..
وهي على هالحال سمعت صوت جرس الباب وصوت العنود يسلم على الجميع ..
لحظات وكانت العنود وام شوق في غرفة شوق..

شوق : ييتي بوقتج ..


العنود باستغراب : وانا كله ياية بوقتي ..شنو صاير بعد ؟..


الام : سواد ويه بعد اشصاير .. ادري يا شوقو انه السوالف كلها
من تحت راسج .. وانا بعد تعبت كثر ما اوقف بويهه.. حليها ابروحج
هالمره .. " طبخ طبختيه يالرفله اكليه "

وتركتهم واطلعت من الغرفة ..

العنود بنبرة خائفه : وقفتو قلبي ايشصاير شوق ؟

شوق: العنود ..ابوي كان حاط مراقبة عالتلفون وصاد رقم وليد..

العنود : يا حسرتي ويا ويلي ....حلفي ..قولي والله ...امبيييييه .. وبعدين
شلون ساكت للحين ... ليش ما قال شي او ما سوى شي ؟؟؟

شوق : لانه للحين مو متاكد منو في البيت له علاقة بالرقم .. شسوي ..
من صج انا خايفه...

العنود : هذي والله البلوة والكارثة اللي ما حسبنا حسابها ..
ماكو الا اندق على وليد وانبهه علشان لا يوهقنا معاه مو صح ؟؟؟

شوق : اي صح بس شنو بيقول ..
ابوي باجر بيودي الرقم المخفر ويسوي محضر ازعاج ... امبييييه .. والله بلوه...




>>>>>>>>> يتبع

الحلقة السادسة



http://alash3ar.net/upload/folder1/a...Qoa2loE0qu.jpg



العنود : خلاص .. انا ادق عليه واقوله
انه يقول انج ما تعرفينه وانه طلع رقمكم من الاسم
او اي مكان لانه وده يختبرج ويخطبج ..

شوق : خوش فكره ... وبالمره يتقدم ويخطبني وانخلص من هالسوالف ..

العنود : انا اروح البيت واكلمه وافهمه شيسوي .. يلا باي ..


شوق : باي ..تسلمينلي يالعنود والله ..


اليوم التالي في المخفر

الاب : انا امس قدمت شكوى بازعاج ومعاكسة وقلتولي بتطلبون صاحب الرقم ..
وهذا انا جيت عالموعد .. لقيتوه ؟؟؟؟

الضابط : اي حجي .. بس الهون ابرك ما يكون .. ونبيك اتوسع صدرك
وتسمع الطرف الثاني وبعدها انسوي اللي انت تامر فيه ..


الاب : اي ما عليه بس اعرفه منو ؟؟؟


الضابط : اتفضل يا حجي ..تعال ..


دخل وليد الغرفة ومعاه وابوه
وقعدوا جدام نظرات ابو شوق الفاحصة اللي قال اعرفكم؟؟؟ ..
اتعرفوني ؟؟؟؟الازعاج اشحقه ؟؟؟


الضابط : لا اله الا الله يا حجي .. اشقلنا يا يبه عطهم فرصة ..


ابو وليد : يا خوي والله السبب خير ان شاء الله .. يمكن الطريقه غلط
بس تاكد انه النية خير ..


الاب : تزعجون البشر وتتعرضون للبيوت والنية خير ؟؟


ابو وليد : علامك يا يبه ماخذنا بشراع ومجداف ..
حنا طالبين القرب في بنتك شوق وولدنا كان بيختبرها بس ؟؟


قام ابو شوق بفزع من مكانه : شوق ..شوق .. تخطب شوق ؟؟؟


ابو وليد : اي يبه نبيها على سنة الله ورسوله فيها شي ؟؟؟؟


ابو شوق : اهني ؟؟؟ بالمخفر ؟؟ ليش علشان مو كويتية ؟؟
احنا هم ناس وعيال اوادم بس الزمن ذلنا وصار هذا حالنا


الضابط : يا بو شوق وسع صدرك الله يهداك الحجي قصده شريف
وان كان منت راضي علشان المكان حدد معاه موعد وخله يجي البيت
ويخطب وتكتمل الفرحة ...ها ... شقلت؟


سكت ابو شوق لفترة وعاد ليقول : ما عليه الخميس ..يلا مع السلامة


وطلع من عندهم وابو وليد وهو يطالع وليد باستغراب..سلمو عالضابط وطلعو...


ابو وليد : يا يبه انت متاكد من اختيارك .. ؟؟؟ شفت ابوها ..؟؟؟
شنو هذا ؟؟؟ما ينطاق ولا يتعاشر ..


وليد : ادري يا يبه بس والله اهيه مثل النسمة ما ادري اهوه ليش جذي ..

ابو وليد : اللي يريحك يا يبه ..
حياتك وانت ابخص فيها ..الخميس انروح باذن الله واللي بالجدر يطلعه الملاس ..


وليد : الله يسهل الامور بفضل الله وفضل دعواتك ..



http://alash3ar.net/upload/folder1/a...zURiFFlhqr.jpg


دخل ابو شوق المنزل : شوق ..شوق ..شوقووو


شوق ( بخوف): هلا يبه .. خير ..


الاب : يبه واحطبه.. تكسر اضلوعج وراسج .. منو وليد ؟؟


شوق مرتبكة : اي وليد ؟؟ وليد منو ؟؟

مسك شعرها بين اصابعه وقرب وجهها المرتعب من وجهه الشرس
وقال بغضب: وليد حبيب القلب ما اتعرفينه يالجذابة .. سودتي ويهي بين الناس
الله يسود ويهج دنيا واخره ... عبالج اخليج تتزوجين اللي بكيفج ؟..
لو تموتين ما تتزوجينه .. بشوف انا والا انتوا ..


وقطها بعيد .. ونادى الام :

" تعالي يا ساس البلا ..تعالي ابيج
الله لا يبارج فيج ولا في بناتج .. كان يوم اغبر واسود ...
سمعيني .. من هني ورايح ان جاست التلفون ولا قربت عنده اكركم كلكم وارتاح ..
ومالها طلعة من البيت الا حق الامتحانات ..
والا والله بتشوفون شي ما شفتوه وبعلمكم الادب من يد ويديد سمعتووووو..


هزت الام راسها مؤكدة انها فهمت المطلوب.. فتركها وذهب الى غرفته .


وبسرعه البرق ردت شوق الى غرفتها وماتت من البكاء..
حائرة تندب حظها في ابوها وما تعرف شتسوي ..شلون بتعرف شصار؟؟ ..
لا تلفون ولا مدرسة .. الم وعذاب كانت في غنى عنهم .. :(


دخلت الام وقعدت على فراش بنتها وسالتها :

شوق يمه شصاير شسالفه قوليلي ...
والله ابوج من كثر ما خرعني ما دريت شسالفه ..
اللحين يوم نام قلت ايي واسالج ..شسالفه يمه تكفين قوليلي ..


شوق: يمة والله ماكو شي .. اخو رفيجتي يحبني واهوه اللي كان يدق
ويسده انا شنو ذنبي ..


لطمت الام خدها قائلة : حسبي الله عليج من بنت ..
وعيني عينك تقولين بعد ..امبيييه حمدي ربج ابوج ما قص راسج وعلقه في البلكونة ..
حسبي الله عليج .. وانا اقول اشفيه شاب نار والدخان يطلع من اذانيه..
واللحين شالحل شنو انسوي ..


شوق : يمه تكفين قومي دقي عالعنود
وقوليلها السالفه شوفيها شتقولج تكفين يمه ... محد غيرها يقدر يساعدنا ..


حست الام ان الفكرة سليمة وقامت بسرعه وكلمت العنود ..
وبمجرد ما رفعت العنود السماعه حتى نزلت عليها الاخبار كالصاعقة ..


العنود : واللحين وين شوق ؟


الام : خنت حيلي كلت المقسوم من ابوها ومنعها من كل شي ..
العنود تكفين شنسوي ؟؟


العنود : عيني من الله خير وانا ارد اكلمج ..



بعد مرور ساعه كانت العنود تدق الباب فاستقبلتها الام بترحيب حار
وكانت شوق معاها فقعدو في الصالة على مرمي من غرفة نوم الاب
حتى يتاكدون بانه نايم بالغرفة ..


شوق : شنو صار ايشسويتي يالعنود ؟؟


العنود : انا توني كلمت وليد وقال انه الخميس بيجون
ويخطبون والموعد حدده ابوج ..


شوق باستغراب : شلون ؟؟ توه يقول لو تموتين ما تتزوجينه ؟؟؟


العنود : يمكن لانه معصب ومحتر..ما عليه طلع حرته فيج بجم طراق ورفستين.. عليج بالعافية :)


شوق : اتمنى يالعنود انه بس يكون محتر ..


الام : يعني نتزهب حق الخميس .. اهوه ما قال شي ؟...


العنود : اي ما عليه كونو جاهزين احسن ..
يلا انا امشي لا يقعد ابوج ويحوشني من الطيب نصيب بعد :) يلا باي ...


مساء الخميس


رن جرس الباب وخرجت نوره لتفتح الباب ..صرخ عليها الاب وذهب ليفتح هو شخصيا ...


الاب : حيالله ابو وليد ..


ابو وليد مستغرب : الله يحييك ..


الاب : اتفضل بو وليد اتفضلي ام وليد هلا والله ولدنا وليد اشلونك يبه .


وليد ينظر لوجه ابيه متحديا : بخير عمي يا عساك دوم بخير ..


دخلت ام شوق وسلمت على الجميع ووزعت الشربات وجلست ..


ابو وليد : مثل ما انت عارف يا بو شوق حنا جايين نخطب بنتكم شوق
حق ولدنا وليد ..لانه بيسافر ويكمل دراسته بره وما راح انلاقي احسن منها حق ولدنا ..
واللي تامرون فيه احنا حاضرين .


سكت الاب قليلا ثم قال : احنا ... احنا ما عندنا بنات للزواج .. سامحوني


بو وليد : افا يا بو شوق .. انت اللي ما كنت راضي ولا بتوافق ليش حددت موعد ؟؟؟
ليش جريتنا اهني عيل ؟؟؟


الاب : علشان اتعرفون انه بنات الناس مو لعبة .. واللي تبونه مو دايما يصير ..
انا جذي رديت اعتباري انا وبنتي .. اللي ولدك بيختبرها ..
وانا قلت كل اللي عندي .. في امان الله ...


وترك الصالة وسط دهشة ام شوق ووليد ووالديه ..


بو وليد : شنو ناطرين بعد ... يطردنا ؟؟؟


وتحرك صوب الباب وام وليد خلفه وبقى وليد متسمر في مكانه..
حتى سمع صوت ابوه يناديه ... طلع مو مصدق اللي حصل ..

شوق في غرفتها تبكي وهي تسمع والدها يقول لامها : ما ابي ولا كلمة فهالموضوع ..
اللي فيني مكفيني .. عبالهم علشان مو كويتين يقدرون يهينونا ويسوون اللي يبون ..
لا .. والله لو اخر رجال بالعالم ما ازوجها اياه .. واللي في خير يرد يفتح هالسالفة مره ثانية ..



>>>>>>>>>>>>>>>>>>> يتبع

رهف

ويعيه على ابو شوك وش هالعنف الفضيع ما حبه والله يعينك ياشوق قلبي معاك وياحسرته وليد كسر خاطري قولي له عندي خووش بنيه يتقدم وانا موافقه من الحين ههههههه منفعله مع القصه هاتي الباقي على احر من الجمر