يا للي كست وجهك رسوم الكآبة
دنياك ما تستاهل الحزن كله

انس التعب والهم وانس الغلابة
والبس ثياب النور والضيق خله

احذر من التفكير تلبس ثيابه
تراه كابوس الوهن والمذلة

والوجد لا ينهش شبابك بنابه
شي يضايق خاطرك لا تشله

ترى الزمن بر وبحر وغابة
ما يستوي لك زعفرانه وفله

وسع خيالك وانتبه من سرابه
ترى لبيب العقل عقله يدله

والعذب حاول ترتوي من شرابه
وانهض بفكرك والهدا لا تضله

مابيك تمشي في طريق النكابة
والشر ما ودي تعيش بمحله

خلك وسيع الصدر بين القرابة
وابليس جنب مسلكه لا تدله

اكتم ظروفك وابد وجه الرحابة
واقنع برزقك حسب دقه وجله

العبد يالنشمي نصيبه نصابـــــه
ماله سوى مقسومه اللي قسم له

والناس في لارزاق ما هي تشابه
أحدن يجيه الرزق وأحدن يتله

وأنت اعتبر حظك بنفس الرتابة
في كل شي وكل أمرك على الله

وإياك تبدي للحسود المهابـــــة
غير الله احذر تندرج تحت ضله

خلك على نفسك شديد الرقابة
تراك محسوب على كل زلـــــة

واسمع وصايا من بعث لك جوابه
كلمة خليل ما قصر دون خلــــه

واياك تعلن للنصوح الحرابـــة
لا صار عدل منطقه لا تملـــــه

واحذر ربيع العمرتخسر شبابــــه
تراه يطوى مثل طي المجلــــــة