سحابةٍ لآح للضميان بارقها = ياما تمنى مطرها كل ضمياني
جتني وحاولت اخاويها وارافقها = وشفت القهر يوم ماطرها تعداني
قلبي عشقها وكل الروح تعشقها = مفتون في حبها يوم الله اشقاني
من شافها وده انه مايفارقها = واللي خسرها يموت وهو خسراني
مشيت مع دربها ود إني الحقها = ورجعت مدري طريقي وين وداني
اظن جاها عجاج ً قام يصفقها = وانا شربت القهر والياس وأحزاني
ياليتها وقفت لي لين اعانقها = واسمعتها صادق الاحساس بلساني
ويضمها الصدر وضلوعي تطوقها = واحطها فوق احاسيسي ووجداني
لكن راحت عسى ربي يوفقها = وانا جلست بعناي اعيش وحداني
ياكثر مابه طورائ قمت اصدقها = يوم الزمن خصني باالشوق واضناني
احيان اقول الزمن با الود مغرقها = واحيان اقولها انها مثلي بحرماني
واحيان اقول ان غدر الوقت ضايقها = وجاها عذاب السنين القشر مجاني
واجمع هجوسي من الضيقه و افرقها = حتى ومليت قول احيان واحياني
يا كامل الزين حسناتك تصدقها = تراه مايندم اللي يفعل احساني
عطني عهود الغلاء الصافي ووثقها = لاتاخذ اذنوب فيني وانته الجاني
يا وردة ً هفهف الغربي بمطرقها = ما كن لي غيرك احباب ً ولا اوطاني
ويا شمسي اللي يرد الروح مشرقها = انا اتحراك عند المشرق الثاني