بعـتـذر للشعر كتاب ورواه=من زلل حرفي ومن قولٍ هزيل
مَاتَجِد من حزم بعض إللي تراه=وماترى فيني سوى خلقٍ جميل
كل طيبٍ ماخذٍ مني حلاه=والردي ماله على مثلي سبيل
يامغلِّب حالك آرجو الإنتباه=إحسب حسابك ترى باعي طويل
هيه يا غادي ترى للناس جاه=لا تخادعني تقول إنك زميل
كل عاقل له بهالدنيا كماه=والذي ماله عقل ماله خليل
جيت لجل الشعر ما قصدي سواه=لو تبي غيره بتلقالك بديل
إنطلق في جو من مثلك غواه=ناس لو تسمع صدا الورقا تميل
لا توهم بي ترى خلفي دهاه=هم هل الصولات والسيف الصقيل
لو وصل شعري لعالي مستواه=مايغر المدح ذي الخلق الأصيل
زايد إعجابك بحرفي وش وراه=ما كتبته للرسايل والطبيل
آه من جهال هذا الوقت آه=مستحيل أرخي جناحي مستحيل
شاعرٍ كالنجم عالي في سماه=شامخٍ ماله على الساحه مثيل
وشاعرٍ خلف الحروف السود تاه=والقصد واضح ولايبغى دليل

http://kll2.com/upfiles/yYh34462.jpg

قوتي ميزه وضعفي روعتي=وإن لحقني نقص لله الكمال
استمد من طيب اصلي عزتي=نايفه عالي شموخي كالجبال
إن عشق قلبي صدق بمحبتي=وإن عشيري مال عنه القلب مال
لا إنكسرله لا ولا احني قامتي=عيبٍ اخضع له وأنا بنت الرجال
غصب ادآري عن عيونه عبرتي=مابي يلمح دموعي بأي حال
وإن نزل دمعي وبل مخدتي=مابقى فيني على الظلم إحتمال
خان ماقدر عطاي وعشرتي=ماحفظ عهدي قطع حبل الوصال
كنت اظن عنده هناي وراحتي=وآثري أطرد لي سراب في خيال
كم تسبب في العذاب ولوعتي=كم تمادى في خطاه ولا يزال
آآه ياكثر الطعون وحسرتي=ماترك للود في قلبي مجال
احمد الله ماخسرت بدنيتي=كان ماني ربح ماهو رأس مال

مهما تغيب وتلتزم هيبة الصمت=يبقى غرامك داخل القلب ثابت
ياللي بعد وصلك وصدك تعلمت=إن الزهر من بين الاشواك نابت
يصرخ شعوري داخلي ماتكلمت=قلي إذا نفسك من الحب طابت
يانادرٍ بين البشر ما توهمت=إن الذكا في فطنتك لو تغابت
أقسمت لك ياروح واقسمت واقسمت=إن الوفا فيني لو الروح ذابت
يا شاعرٍ يزهابه الطيب والسمت=يضوي حضوره لو ضياالشمس غابت
عجل بوصلك يالغلا لو تكرمت=ترى عيوني عقب ماغبت شابت

صباح الحب ياغالي صباح الخافق المنصاب=صباحي ليل من دونك وزود الشوق مضنيني
صباح الشوق ياأقرب لعيني من جفن لاهداب=صباح الخير ياعمري عساك ترقّ وتليني
تهيضت وسرى ليلي إلى من البدر قد غاب=تراك إنت الوحيد إللي غيابه حيل يشقيني
تعبت اصبر أشواقي وقلبي والصبر غلاب=كأن الشوق في صدري لهيب ونار تكويني
أنا إلى من لفى طيفك افز من الوله عالباب=واضمه حيل لأحضاني واحس إنك تحاكيني
غريبه دنيتي دونك أحس إن القراب أجناب=أحس كل القلوب إللي حوتني ماتكفيني
ترى والله لوتأمر على عمري فداك رقاب=عليم الله في صدقي تدلل يانظر عيني

يِحاسِبني على الزله ولاحد منها معصوم=يخالف كل اطباعي يعاندني بِأحكامه
احس إنه مِجافيني بنظراته عتاب ولوم=ويتحاشى يحاكيني كأنه يعلن خصامه
غلاي ودنيتي..ناسي..نصيبي حظي المقسوم=كسرني صمته القاسي وحزنٍ بالحشا ضامه
غريبه ماهي اطباعه حبيبي محتويني دوم=علامه مايصارحني عن إللي كدر أيامه..؟؟
ولو كان الخطا مني يظل قدر الغلا محشوم=يِجّله كل مافيني..واعز النفس بِإكرامه
أنا غير البدر مالي ولا يحجب سماي غيوم=اببقى له ويبقى لي رفيق الليل واحلامه
ذبحني مّر إحساسي يبي يفصح عن المكتوم=يهيض قلبه الناسي ويطلق باقي سهامه
رجيته لايِعنيني يزود عالهموم هموم=عصاني راح يشقيني حكم عالقلب بِإعدامه
ياويلي مابقى فيني من اللوعه صبر وعزوم=جفا حلو الكرى عيني يمر الليل مانامه
على شان السنين إللي تِقاسمنا لذيذ النوم=تحاشى الشك ياخلي يفرقنا بِأوهامه
ولاتغويك نزعاتك تجنب دعوة المظلوم=وحاسب نفسك وذاتك وعيش بنفس لوامه

http://kll2.com/upfiles/ukd32959.png

جيت اخاطب بالشعر فكر المحايد=جيت آوضح مقصدي ماهي جزاعه
مايغير منهجي أهل المكايد=ماتهز الريح شامخ بإرتفاعه
الحياء مبداي والمرقى سنايد=والمعاني جت من آفكاري شجاعه
من بحورالعشق لا صغت الفرايد=لا تظنون الشعر عندي صناعه
عشت حلو الحب نيران ووقايد=ذقت مر الشوق حالي وبقناعه
ياكثير الهرج ياشين العوايد=خل عنك الهدر واسلوب المياعه
المشاعر والهوى ماهي نقايد=والقلوب الصادقه ماهي بضاعه
مانظمت القاف أنا لجل الفوايد=ماشكيت الوجد في رجوى شفاعه
هذا حال الحب في كل العقايد=وآآ عنا قلب المفارق وآآ ضياعه
صادق إحساسي وصغته بالقصايد=شاعرة وأعرف حدودي ياجماعه

http://kll2.com/upfiles/AgJ32959.png

يامن ملك قلبي وله هيبة ملك=حاولت ابعد.. بس قربني غلاك
يحتاج لي قلبك وأنا احتاجلك=تركت لي بعضك وأنا كلي معاك
لو مانت من ربعي ولاني من هلك=لكن دمّي.. به خلايا من دماك
في وسط قلبي لو تهاجر منزلك=ماينقفل شباك شوقه في رجاك
يانجم ساري في مدارات وفلك=الارض ارضك والسما تبقى سماك
تضوي حياتي طلتك واتخيلك=يإللي تداوي علتي بسمة شفاك
لله درك كيف تقدر تمتلك=قلبي الذي مايملكه شخص سواك
ابحرت بإحساسي وقصدي يوصلك=واناغم آنفاسي مع نسمة هواك
ياما تمنيتك وكم جيت اسئلك=عن سر احزاني بعد نشوة لقاك
الين قلبي من عنا هجرك هلك=لا ارتاح في بعدك ولا ذآب بدفاك

هديت الحب لك ورده عساها توصلك مني=عسى قلبك على وده ويسقيها عسل صافي
غلاتي صدق حبيتك وظلم الهجر عذبني=بِلهفة حب ناجيتك جبرني قلبي الوافي
تبعثرني سواليفك وأحضانك تلملمني=وأناجي بالخفا طيفك وطبعك للأسف جافي
آبي تلمس دفا شوقي وإحساسك يلامسني=وحس النبض بعروقي ينبْه قلبك الغافي
تلاشت كل طموحاتي وقل الوصل روعني=وتاهت كل خطواتي بهدر وكذب عرافي
هل إحساسي على بالك ترى إحساسك مصاحبني=حبيبي القلب مايحمل لك الا شوقي الدافي
أنا من دنيتي حسبي تردك لي وتنصفني=حلو وصلك بقلبي له مرابيع ومصيافي
آلا ياوردةً فاحت عبيرً حيل يسحرني=سنين العمر لو راحت يبقى عطرها ضافي

مارجـيـت مــن الـدخـيـل المنـفـعـه=وماهقيـت الضـيـم بيـديـن العشـيـر
ماشكيـت مــن الطـعـون الموجـعـه=وماقويت اصبر على موت الضمير
بــس قلـبـي لا طــرآ مــن ضـيـعـه=قـلـت يادنيا..الـنـدم مـافـيـه خـيــر
كــم سقيـتـه حــب صـافـي منـبـعـه=وإمتلـك هالقلـب وأصبـح لـه أسيـر
جــوع قلـبـه مــن حنـانـي اشـبـعـه=وجبـر كسـري فـي حساباتـه كثـيـر
لويبـي عمـري آجـي رهـن إصبعـه=ولو يناديني علـى الرمضـاء اسيـر
إن طلبـت رضـاه شِ إلـلـي يقنـعـه=كـــل مـاقـدمـت بعـيـونـه صـغـيـر
الـوفـا عـنـده غـصـون مـزعـزعـه=كـــل مـاهـبـت يفـرقـنـا الـمـصـيـر
كــــل مـايـلـمـح ســــراب يـتـبـعـه=وآعــذابــي دآم خـفـاقــه ضــريــر
سـهــم ظـلـمـه والـشـقـا مـايـدفـعـه=غـيـر ربٍ عـالـم الغـيـب وبصـيـر
ضيـق وصـلـه يوم..وفـراقـه سـعـه=سهل ظلمـه لي..وفـي عدلـه عسيـر
الاســـى مـــدري مـتــى بــأودعــه=يالله الجـألـك..وبـك دوم استـجـيـر

إنت الملك والكل من حولك جنود=وحبك بقلبي يالغلا ماتجهله
حكمت قلبي مثل حكم آل اسعود=غيرك يموووت ولاوصل هالمنزله

أنا ياساكنً قلبي آبيك وماقويت فراق=((عزاي بغيبتك صوره)) اناظرها تسليني
لك الله ضقت من نفسي وهالعالم بعيني ضاق=دخيلك لاتزيد القلب لوعاته تكفيني
وش إللي تخسره قلي لو إنك ترحم الخفاق=إذا مافيك تنصفني ياليت إنك تحس فيني
أنا مالي وطن غيرك غرامك يسكن الاعماق=احن لشوفتك واوله لحضنك يانظرعيني
وحيد إبغيبتك قلبي جليس الحبر والاوراق=يسامر بالخفا طيفك ويحس إنك تحاكيني
كثير الناس من حولي ولا غيرك بعيني لاق=ياأغلى إنسان يرجح بالمحبه في موازيني
آلا ياأغلى هدايا الكون بعدك يدمي الأحداق=عسى الله لايبارك في فراق حيل مشقيني

وبالنهايه لا تحاتي=تبقى في عمري وذآتي
أحلى إسم وأغلى كلمه=إنطقت فيهاااا شفاتي

يموت الحب والدنيا بلاوي=وغدرٍ يفقد العاقل صوابه
مريض القلب مامنه رجاوي=قضى عمره وهو يطرد سرابه
يكثر من هروجه والدعاوي=حضوره صار سيان وغيابه
حسبته حصن بالشدات ياوي=وآثاري هقوتي راحت طلابه
حسافه عالغدر له قلب قاوي=ياويله وين يهرب من عقابه
وأنا مالي عن الطيبه غناوي=ولو يقسى علي حضرة جنابه
لربي الحمد أجزلي العطاوي=جمال وعقل وأخلاق وذرابه
أصيله بنت أهل جود ونخاوي=ربيت بعز وشموخ ومهابه
ولاخيبت في يوم الهقاوي=ولو مكره علا مكر الذيابه

http://kll2.com/upfiles/NN591664.png

أنا ياهم ماشلتك جبرني اليأس والحرمان=كسرني حظي العاثر ظلمني بأول أعوامي
آلا ياهم جاوبني وش آخر رحلة الأحزان=وش آخر قصة أوجاعي وجرحي ونزف الآمي
آحس إللي وسط بحرك غرق ماينفعه إنسان=اصارع عاتي أمواجك واشوف الموت قدامي
تعبت ابحر مع أحزانك واهدي موجك الغضبان=علامك ياحزن واقف مابين الفرح وأيامي
أنا مليت من ظلمك ولاظنك علي شفقان=دخيلك ياحزن إرحل وداوي خافقٍ دامي
وش إللي راح من عمري وش الباقي من السلوان=قضى عمري وأنا مدري اطالع موقع أقدامي
زرعت الفرح بأوهامي صبرت ولانبت أغصان=تعبت انطر أنا الفرحه تعبت أركض ورى أوهامي

قصتي قصه عجيبه تذهل العقل الرزيني=كم لي اكتمها وضاق البال منها يافلانه
صدمتي في الحب طعنه آدمت القلب الحزيني=ياعسى من كان سبة لوعتي يلقى هوانه
فاضت جروح المشاعر والآسى زود آنيني=مادريت إن التنازل يابشر ولّى زمانه
جيت ابي روضة خفوقك بعدما ضاقت بعيني=فاسمعي من بوح قلبي اعترافه بالإدانه
وإقبلي مني اعتذاري إختلط شكي بيقيني=حرت اميز في دروبي إنخدع قلبي بحنانه
العشير إللي تنكر عقب ماضيع سنيني=مارحم حرقة فؤادي ماجبر كسري لعانه
إنحصر فكره بذاته مارحم ضعفي وليني=غرّ قلبي لين سلم له حياته بإمتنانه
خوفي العذال تشمت يظهر الحقد الدفيني=انشديه إن كان مؤمن بالمُهيمن جلّ شانه
ينصر المظلوم مهما طال ليل الظالميني=ليه ماراعى خفوقي ماحفظ عهده وصانه
هان قدره يوم حبه ولغلاه اصبح رهيني=ليه ماحكم ضميره واهو من نفس الديانه
ضحكته باقي صداها وعبق عطر الياسميني=والمكان إللي جمعنا غيبته هزت كيانه
اشهد إنه في فؤادي رآهن ويكسب ضنيني=من يسوي بي سواته لاحشا ماني جبانه
للوفا فيني علامه فارقه بينه وبيني=هذا من طيبي واصلي رغم تهميش الميانه

لا صار كذبك مثل صوت المنابر=والغدر وياالظلم عندك فضيله
إقرأ على الاخلاق عم وغافر=وإعلم بإن مثلك مضيع دليله
ياخاين إحساسك بزيف المشاعر=إبعد عن دروب الهوى لا تجيله
تراك في الدنيا مسافر وعابر=عايش بستر الله وناكر جميله
دور لقلبك قلب للحب ناكر=تضحك معه ساعه وتطلق سبيله
إللي يذل غصبن من أرضه يهاجر=وأقسمت أنا ماأحيا بعمري ذليله
بأرحل من جروحك بعزة وأسافر=والحمد لله لو حظوظي قليله

http://kll2.com/upfiles/qnz79078.png

ياقضاة الحرف في شرع الكلام=إنصفوا في حكمكم بنت الرجال
قصتي قد غادرت عشرين عام=ابتداها حب وانهاها خيال
الليالي حالها شرق وشام=والعمر مابين ميلٍ واعتدال
ماعلى شرواي من طبع اللئام=الصبر عندي مثل صبر الجمال
مانظرت لنبش خفاش الظلام=طايحٍ قدره وأنا رمز الكمال
وش اسوي فيه يانسل الكرام=بعد ماني كنت اعده راس مال
والله انه صار في عيني حطام=لعنبو قلبٍ بحبه لا يزال

http://kll2.com/upfiles/mkD47487.jpg

ياجروح بالمحاني الدماء منها تسيل=لاتزيدي في عذابي مالك بصدري سعه
آه من هم بلاني واحرق القلب بفتيل=والسبب حاقد أناني ساترته الأقنعه
إرتوى الحب وحناني ثم تنكر للجميل=لاقرابه..لاحميه..لارجوله تمنعه
كنت اظنه عز شأني وافيٍ شهم أصيل=للأسف به خاب ظني وإنكسر قدري معه
كان فيه الله بلاني ألجمه مو مستحيل=ثْم اباشره بخطابي والطمه به واصفعه
روح (يافلان الفلاني) إكتشفت إنك (قليل =الحياء)..إن لم تصونه فأصنع إللي تصنعه
إبعد وفارق زماني لعنبو مثلك خليل=لوتبي ذلي فمالك غير رأسي تقطعه
إنت غصن للخيانه كل ماهبت يميل=دامني حره اصيله جاك ردي وإسمعه
إنت ماتسوى ترابي يالردي فكرك عليل=ماعليه من طعونك طبعك الله يقلعه
في الشوامخ وإنت داني إترك القول الهزيل=جعل يفدا المحصنات آلفين مثلك إمعه

حبيب الروح لو يشفي غليله=ترى مسموح لو روحي نحرها
عطيته قلب و جروحي عليله=سقيته حب ودموعي نثرها
أداري الحزن وهمومي ثقيله=ظلام الليل لدموعي سترها
أحس بغيبته كني قتيله=وحرة صرختي صدري قبرها
ياويله من عذآب الله ياويله=حياتي كم تمادى في قهرها
فؤادي مايخون ابداً خليله=يصون العهد لو خله نكرها
بطبعي بالغلا ماني بخيله=لخلٍ غالي روحي أسرها

الشعر لوما كتبته بصادق إحساسي هجرني=والله لو للصدق ديرة أنا أول من عنيت
ياقصيد الحب قله غير قيده ماأسرني=غير وصله غير قلبه مارجيت وماهويت
قله طيفه في غيابه بعاطر انفاسه غمرني=مارحمني من عذابي ماعتقني ماهتنيت
إشتكيته لليالي والحنان إللي قصرني=عاشقه والعشق بلوى ليتني به مابتليت
آه لو يدري زماني عن حنيني ماقهرني=قله إني فيه آراهن بالمشاعر مابقيت
لأنه أغلى من عيوني والوحيد إللي قدرني=إمتلك حبه شعوري والغلا له ماحييت
بحفظ بقلبي هيامي للوليف إللي غمرني=للهوى أسمى صفات وللوفا عز وصيت

يارفيق الليل لامنك قويت=تخلف وعودك فلا تنوي الغدر
طعنة بالظهر منك ماهقيت=ماسمعت بـ لاضرار ولاضرر
لاتقول إنك لهجري مانويت=ليه قلبك صايرن مثل الحجر
ياحلو وصلك ليا منك صفيت=بس قلبي وين يلقالك عذر
بعت عمري لك ومنك ماخذيت=غير هم وويل وصدود وهجر
لو آبي اعشق من أمثالك لقيت=بس مثلي وين تلقالك بشر
دامك إنت إللي تخليت وسليت=رح بدربك والله يحب الستر
احمد المولى بإني مـاابتليت=فيك واتغربلت بك طول العمر

http://kll2.com/upfiles/T1S30961.jpg

كثر ماقلت في نفسي اببدأ رحله النسيان =تموت الروح ياروحي ويبقى حبكم ضافي
تصدق حتى لو آنسى وجودي اذكرك يافلان=يحبك كل مافيني غرامي ماآظن خافي
ترى وإللي خلق خلقه من انس ومن جماد وجان=فداك الروح ياغالي وكل العمر لك صافي
غناتي لايجي في بالك ابد اقوى على الهجران=انا لاخر نفس ودي نخلد حبنا وافي
أدارِيْ الحزن والعبره أحاول اظهر السلوان=وأنا قلبي نفذ صبره..حموله هدت اكتافي
نخاك القلب لاترْدْه بحق الخالق الديان=ترى قلبي على عهده ووحدك غاية أهدافي
أنا من دنيتي حسبي تبقى لي ياأغلى إنسان=حلو وصلك بقلبي له مرابيع ومصيافي

http://kll2.com/upfiles/T1S30961.jpg

آلا ياسلوة الخاطر آبيك اليوم تسمعني=قصيدي إنت به معني وكم سخرت لك قافي
غرامك يادفا بردي لهيبه حيل ذوبني=علامك حلمنا الوردي أحسه غادر لحافي
سواليفك معي نغمه أرددها وتطربني=تزيح القلب عن همه يافايق كل لوصافي
أحس إنك مثل طفل يلاعبني ويعجبني=يعاتبني أنا مهمل وأجي يمه بكل مافي
معاك الحب شي ثاني ونارالشوق تشعلني=بضمك حيل لأحضاني دفاك البلسم الشافي
ترى لو أنت لي شاري توصلني وتفهمني=رغم حبي وإصراري أقول اليوم لك كافي
ترفق بي وخاف الله بربك لا تضيعني=ترى قربك دوى العله..حرام تسبب إتلافي
أبي منك وعد تبقى بعمري ماتفارقني=كما بدر السماء ترقى بعشق حيل شفافي

من بعد غنتني لحون إنتظاري=وغيابك اظمااني وثلج الصبر ماع
كفرت بأنك بأول الوقت شاري=وآمنت بأنك تالي الوقت بياع
ما عاد لي خاطر اسامح واداري=والحال متأزم .. سبب زود الاوجاع
ماعاد في مجهولك البحث جاري=واقول هذي عاقبة شين لطباع
مادمت في وصلي هواك اختياري=حسب المزاج وحسب ترتيب الاوضاع
ترى الفضاء ماضاق من نجم ساري=ولا البحر يظلم ليا عثرب القاع
وان كنت جاهل عن معالي مداري=اسأل عيون الشمس مع كل ذعذاع
واذا العشق به نكستي وانكساري=لابو جروح الحب وطعون الأضلاع

لو تنشرى كل الحروف بـ غالي=لو جاد لي وزن الشعر وبحوره
لو أكتب بماء الذهب أقوالي=لو جبت درعٍ جودته مشهوره
مايدرك إللي بخاطري مثقالي=مايوصل حدوده وعمق شعوره
ماكل ماترجي القلوب تنالي=خسران من جاراك في المعموره
تزهى بك الاشعار ثم تختالي=بعض البشر يبقى بعزة نوره
فاضت لك أبيات القصيد إجلالي=لوغاب مثلك حاضر مأثوره
رايك حكيم وكلمتك بأفعالي=شعرك فريد وبك تزين سطوره
ياعالي كل مافعلته عالي=بوحك ترى ماله مثل بحضوره
يا .... لو السعد ينكالي=أعطيك من زاد الفرح مذخوره

منحرف حظي وعمره ماتسنع=كن أيامي غدت لأمره مطيعه
واقف ضدي ويتحدا ويمنع=وصل لقيانا وكم موعد يضيعه
ياوجودي والحزن مني تشبع=وجد مظلوم وماحصل شفيعه
كم على بعدك أنا قلبي تقطع=ياهناء عمري ويازهرة ربيعه
في غيابك كيف مدري وش بأصنع..؟؟=والزمن غدار من يأمن صنيعه
إسكن بقلبي وبشغافه تربع=لاتقاطعني فراقك ماأستطيعه
أعشقك بإحساس كل العالم أجمع=والغلا لك إنت وحدك في الطليعه
كيف بتناساك والخافق تولع=بك..؟ وأيامي تمر دونك شنيعه..؟
كيف وعيوني على طاريك تدمع..؟؟=كيف وأشواقي تضيق بهالوسيعه..؟؟
قول وش يرضيك ياعمري..؟؟ وإسمع=صوتي إللي بح من طول القطيعه
ياحبيبي لو تخاف الله ترجع=لاتضيع نشوة الوصل البديعه

قصيدة شعر أهديها لمن له في الحشا مرقاب=ملك روحي ملك فكري وحبه في شراييني
مادآم إن القصيد اصدق تعابير الوله بخطاب=بظل أكتب قصيدي يالغلا حتى تلاقيني
دخيلك بس سامحني إذا قافي أمامك شاب=بحق الله مهما قلت ماوفيت لك ديني
مكانك في وسط قلبي وفاتح في الصميم أبواب=تعال إرحم عنا حالي ياليت ترق وتليني
تجي وتروح هالدنيا وأنا مالي سواك أحباب=رفيق الدرب ياروحي ومن غيرك يواسيني
أبي وصل وغلا منك وتعطيني بدون حساب=أحبك وأعشق ترابك وأبي حضنك يدفيني
عطيتك عشقي وشوقي وجاء الخافق لكم طلاب=أنا ماأقوى على الفرقا أبي بالوصل ترويني
ولك سقت العمر فدوه وأمرك يالحبيب مجاب=احس إني ملكت الكون حين القاك بيديني
لعلمك مستحيل أنسى غلاتك ياأقرب الاقراب=عساك تدوم ياغالي وتبقى بهجة سنيني

http://kll2.com/upfiles/SbS94736.jpg