اتغزل بالقوافي والحروف الابجديه =كل طاروق على الحون تناسب له اشده
مستعين بهاجس يكشف لي اسرار خفيه= مستمد في تفاكير لمثله مستعده
وتذكر كل موقف وش بقاله من بقيه=واستعيد الذكريات وفلم ماضي استرده
لين اعرف الي تسبب في ملفات القضيه=واتأكد من مواضيع عليها مستجده
واعرف سرالخوي الي تردى مع خويه=واظهر اسباب خفيه للردى تقدر تحده
يوم افكر بالمواقف كلها حسنه وسيه=والله انه لو تمادى غير يرجع لي مرده
كيف ينسى خاين العشره لليال سرمديه=ماتذكر في رخاها ولاتذكر وقت شده
الله الله ياطريق مشينا مشاويره سويه=ان مشينا معه ساعه وان مشينا معه مده
والله ان العشره اللي جمعتنا مع بعض ماهي خليه=فيه موقف فيه قصه لد طرفك فيه لده
والحقيقه واضحه مثل القمر والشمس حيه=لو جلت نوره اساسه من ضياها مستمده
ولا تسمع للمسولف لاكذا والا كذيه=اتفنن بالليالي والليالي مجرهده
لين تاضح بالدلائل والبراهين القويه=علم واضح بالمجالس كل رجال يعده
والرجل لخطا ماهو بعيب اعترافه بالخطيه=المصيبه لامزجها واختلط مزحه وجده
وكان صمل ماتراجع وبتلا فيها بليه=والله ان الي بناه وعمره لازم يهده
ولو نحكم كل كلمه مثل همال ابرديه=كل ميل منك جاني قلت يارجال عده
ولا تشره غير للي بالفعل يشره عليه=الرفيق اللي ليامنه بدى الازم يسده
ولايجاملني على فعل الخطا ويقول ليه= استعذ بالله من الشيطان ودعس فوق خده
كل مشيه بالصراحه والعلوم الواقعيه=مايهمه لو نقص بالبحر جزره ومده
والردي لابالجمايل لاعليه ولا عليه=وان ضرب درب المهالك قلت ربي لاترده
ولا حشا لله مايلحقك من يمي اذيه=وان عطيتك علم عده ماهرجته غير قده
من رجال ساس ثابت للوفا واهل الحميه=عزتي للي وقفنا مع الايام ضده
ان عزمنا بالنوايا ناخذ النيه مطيه=ماتغير نية الرجال لو ينباح سده
وكان جت لطيب والشيمه وجت للمقدريه=والله انك يارفيق الخير تاخذ ماتوده
وان وقفنا للفعايل كلبونا بوارديه=كم شجاع لانطحنا صاح ثوبه يقده
وكان وصلت للحلوق وعودت للجاهليه =والله اني ماتنازل لين تمشي لي موده
سيفي اللي يوم اسله يورد حياض المنيه=في يميني يوم كلن واقف من دون حده
والبعيد اللي يجازف للرياح الموسميه= ويتسمع للمسولف هات علم العلم وده
ما نحسب له حساب ولانقدم له هديه=لو تنومس فالمجالس فعل عمانه وجده
والبيوت اللي نعتني اكتبيها يا ايديه =ذكريات الراحل اللي مابقى الاخط يده